Gjykata e Posaçme e Apelit ka urdhëruar Prokurorinë e Posaçme kundër Korrupsionit dhe Krimit të Organizuar të regjistrojë kallëzimin e bërë nga ish-gjyqtari i Apelit, Alaudin Malaj, kundër ish-ministrit të brendshëm, Fatmir Xhafaj, kreut të Policisë së Shtetit Ardi Veliu dhe zyrtarë të tjerë të policisë, të cilët i akuzon për “grup të strukturuar kriminal”.
Nëntorin e vitit 2019, Prokuroria e Krimeve të Rënda e asaj kohe, vendosi për mosfillim procedimi penal pas kallëzimit të Malajt.
Vendimi kaloi në Apel. Me shkrirjen e Prokurorisë dhe Gjykatës së Krimeve të Rënda, dhe inkorporimin e tyre brenda SPAK-ut, çështjen e mori në dorë Gjykata e Posaçme e Apelit për Korrupsionin dhe Krimin e Organizuar.
Kjo e fundit vendosi shfuqizimin e vendimit të nëntorit dhe ka urdhëruar prokurorinë e SPAK të regjistrojë kallëzimin ndaj Xhafajt, Veliut dhe zyrtarëve të tjerë të policisë.
Ish-gjyqtari Alaudin Malaj pretendon se, Policia e Shtetit nuk ka reaguar ndaj disa kërcënimeve të bëra ndaj tij apo familjarëve.
Më 27 korrik të këtij viti ai u tërhoq nga detyra e gjyqtarit pa kaluar në procesin e vettingut.
Përmes shkresës drejtuar kryetares së KLGJ-së, Naureda Llagami, Malaj thotë se jep dorëheqjen për shkak të një marrëdhënie tjetër pune, e cila siç sqaron Malaj nis më 1 gusht 2020.
Në letrën e dorëheqjes Malaj shpjegon se ka punuar pranë sistemit të drejtësisë qysh prej vitit 1993, duke shërbyer në disa gjykata të vendit, ku kulmi i karrirës së tij, ka qënë drejtimi i Gjykatës së Apelit Tiranë./ Opinion.al
