Lufta e madhe ekonomike mes Shteteve të Bashkuara të Amerikës dhe Kinës, ndoshta nuk do të ndodhë. Pas dy vitesh plot tensione mbi marrëdhëniet tregtare, dy superfuqitë ekonomike të botës po shkojnë drejt një marrëveshjeje. Sinjali i fundit vjen nga Donald Trumo, i cili nëpërmjet një postimi në Tëitter ka njoftuar se do të shtyhet hyrja në fuqi e sanksioneve mbi importet kineze.
“Jam i lumtur të njoftoj se kemi bërë shumë progres në negociatat tregtare me Kinën mbi çështjet strukturore që kanë të bëjnë me pronësinë intelektuale, transferimet teknologjike, bujqësinë, shërbimet, qarkullimin e parasë etj. Si pasojë e këtyre negociatave produktive, do të shtyj sanksionet që ishin parashikuar të hynin në fuqi më 1 mars. Duke menduar se progresi mes dy palëve do të vazhdojë, do të përgatisim një takim me presidentin Xi në Mar-a-Lago, për të mbyllur marrëveshjen”, ka shkruar presidenti amerikan.
Ndoshta jemi kthyer në pikën fillestare? Presidenti kinez Xi Jinping ishte nga të parët personalitete të huaj që u prit nga Donald Trump në resortin e tij privat në Mar-a-Lago në Florida, në prill të vitit 2017. Atë kohë, Trump tentoi të vendoste një marrëdhënie personale me homologun kinez, por që më pas u zbeh nga sulmet për tregtinë e jashtme.
Menjëherë pas këtij postimi të Trump, bursat kineze kanë shënuar rritje duke treguar se optimizmi dhe një marrëdhënie e mirë mes dy superfuqive, ndihmon krejt ekonominë globale./Opinion.al
