Bashkimi Europian i bën thirrje Qeverisë shqiptare që të marrë parasysh rekomandimet e bëra nga OSBE për ligjet e asaj që është quajtur paketa anti-shpifje, që do të kalojë në votim këtë javë në Parlament.
“Komisioni ka shqyrtuar paketën legjislative në media, ka bërë komente dhe ka shprehur shqetësimet përgjatë gjithë procesit të përgatitjes së draftit. Komisioni i ka bërë thirrje autoriteteve që të marrin në konsideratë komentet e bëra nga OSBE dhe rekomandimet e Këshillit të Europës, të kryera përmes fondeve të BE, në mënyrë që të sigurojë përputhshmërinë me standardet europiane në fushën e lirisë së shprehjes. Komisionet parlamentare kanë miratuar mbrëmjen e kaluar një draft të rishikuar të paketës. Megjithatë, në draft nuk janë marrë parasysh disa rekomandime të bëra nga aktorët ndërkombëtare dhe kjo rrit shqetësimet. Është e rëndësishme që të gjitha rekomandimet e bëra nga aktorët ndërkombëtarë – të përsëritura sot nga komisionerja e Këshillit të Europës për të Drejtat e Njeriut, Dunja Mijatovic – të merren parasysh para se drafti përfundimtar të kthehet në ligj”./ Burimi: A2 CNN
