Ish-ministri i Brendshëm, Fatmir Xhafaj ka qenë kritik ndaj aksionit të fundit anti-KÇK. Në Komisionin e Ligjeve, Xhafaj ishte kritik ndaj Kryeministrit Edi Rama.
“Politika dhe Rama personalisht ka udhëhequr një debat të fortë, duke u treguar i pakujdesshëm sepse gjyqtarët dhe prokurorët kanë tashmë “qeveritë” e tyre. Flet më shumë Rama se KLGJ dhe KLP sidomos në rastin e gjyqtares së Krujës që liroi Indrit Doklen. Është e papranueshme që KLGJ s’ka reaguar ende për këtë rast”, është shprehur Xhafaj.
Sa i përket kompetencave shtesë për Inspektorin e Lartë të Drejtësisë, që i lejojnë atij të pezullojë prokurorë dhe gjyqtarë, ministrja e Drejtësisë, Etilda Gjonaj, shpjegoi në emër të Qeverisë se kjo ndërhyrje vjen për shkak të disa problemeve që janë vënë re me ligjet e Reformës në Drejtësi.
“Qartësimi i veprimeve dhe i masës që propozon inspektori i lartë i drejtësisë, garantojnë jo vetëm rikthimin e besimit te organet e drejtësisë, por garantojnë edhe pavarësinë e sistemit të drejtësisë. Pasi do të jetë inspektori që do të vlerësojë nëse veprimet diskreditojnë figurën e gjyqtarit dhe prokurorit deri sa të merret një vendim përfundimtar”, tha Gjonaj.
Por edhe për këtë ndërhyrje, reagim pati sërish nga ish ministri i Brendshëm Xhafaj.
“Kur ndryshojmë ligjet duhet të jemi shumë të kujdesshëm dhe druaj që shpeshherë, paaftësinë tonë, ose problematikat që mund të kemi në zbatim kërkojmë t’i gjejmë te ligji në vetvete. Ka nevojë për një analizë të plotë, për të kuptuar çfarë është pjesë e gabimeve tona dhe çfarë është pjesë e nevojave që ka për t’u mbështetur me ndryshime në ligjet përkatëse. Sepse ndryshe ne mund të synojmë të vëmë vetulla mekanizmave të caktuar, apo institucioneve të sapongritura, por mund t’i prishim sytë reformës në drejtësi”, tha Xhafaj.
Ligji Special u miratua në formën e një akti normativ nga Qeveria të premten e shkuar dhe u prezantua si një ndërhyrje e domosdoshme për të goditur pasuritë e krimit të organizuar si dhe pjestarëve të tij që i kanë shpëtuar Drejtësisë në forma të ndryshme.
Kjo ndërhyrje ka shkaktuar debate të shumta dhe nuk kanë munguar kritikat se masat e ashpra të parashikuara rrezikojnë të cënojnë disa të drejta dhe liri themelore. Ligji u vlerësua nga ambasada amerikane në Tiranë dhe Delegacioni i Bashkimit europian si përpjekje e shtuar e Qeverisë për të trajtuar fenomenin e krimit të organizuar, por të dyja palët theksuan se do ta ndjekin nga afër zbatimin e tij./ Opinion.al
