Organizata Botërore e Metereologjisë (WMO) tha se një bazë kërkimore, e vendosur në majën veriore të Antarktidës, ka raportuar për një temperaturë që nëse konfirmohet mund të jetë një rekord për kontinentin e akullt.
Zëdhënësi i organizatës Clare Nullis, tha se baza argjentinase regjistroi një temperaturë prej 18.3 gradë Celsius, ndërkaq temperatura më e lartë e regjistruar ndonjëherë në këtë vend ishte 17.5 gradë Celsius.
“Gjithçka që kemi parë deri më tani tregon një rekord të mundshëm legjitim por sigurisht që do të fillojmë një vlerësim zyrtar të procesverbalit, pasi të kemi të dhëna të plota”, tha raportuesi për rekordet ekstreme të motit në agjencinë e OKB-së, Randal Cerveny.
WMO thotë se Gadishulli i Antarktidës, në majën veriperëndimore të kontinentit, pranë Amerikës së Jugut, është ndër rajonet ku është shënuar ngrohja më e shpejtë në Tokë, me gati 3 gradë celcius, gjatë gjysmëshekullit të fundit.
Gjatë kësaj periudhe 50-vjeçare, janë tërhequr rreth 87 për qind e akullnajave përgjatë bregdetit perëndimor të gadishullit, ndërsa gjatë 12 viteve të fundit ka ndodhur një tërheqje edhe më e përshpejtuar./Opinion.al
