Fushata elektorale e Partisë Demokratike ka tre gabime kryesore sipas Anri Balës. Në diskutimin në emisionin “Opinion” në Tv Klan, ai thotë se gabimi i parë është konsiderimi i fushatës së Partisë Socialiste si tallava. E dyta, personat që ende nuk janë pjesë e pushtetit dhe gjenden në dyert e SPAK-ut. E treta, vendosja e një personazhi për të ofenduar kryeministrin.
Anri Bala: Gabimi i parë që unë do ta shquaja te z.Këlliçi kur tha që fushata e Ramës është tallava. Ne bëjmë sikur vijmë të gjithë nga Parisi dhe ky turbo-folku na duket çudi e madhe. Ne bëjmë sikur të gjithë shkojmë blejmë bileta te Teatri i Operas dhe Baletit, ndërkohë asnjëri s’e ka parë minimalisht “Berberin e Seviljes” një herë në jetë, flas në maksimalizim të shoqërisë shqiptare. Unë kam pasur fatin se kam qenë gazetar kulture, shkoja disi i detyruar, duke rregulluar edhe kulturën për Teatrin e Operas. Pjesa më e madhe e shoqërisë shqiptare është folk, turbo-folk. Ne dalim dhe e bëjmë një sondazh ose edhe këtu nga studio dhe na kthejnë një përgjigje.
Belind Këlliçi: Tallava.
Anri Bala: S’është tallava, është folk, turbo-folk.
Erisa Xhixho: Po ofendon qytetarët kështu.
Anri Bala: Jo se s’i ofendoj qytetarët. Edhe juve po tjua vë muzikën do të ngriheni dhe kërceni. PD-ja vetë, me këngën e Berishës u ngritët dhe kërcyet.
Belind Këlliçi: Rrimë te programi.
Anri Bala: Për programin, programi, kryesorja nuk më shqetëson mua për njerëz që kanë kaluar në qeveri apo në bashki që kanë 12 vite në pushtet apo 20 vite në pushtet dhe janë në SPAK. Mua më bezdisin këta që s’kanë asnjë ditë pushtet dhe janë dyerve të SPAK-ut. Ky është problem i madh se imagjinoje kur të jenë në pushtet se çfarë raporti do të kenë me SPAK-un. E treta më e rëndësishmja për mendimin tim, besoj se zoti këshilltar i madhërishëm ju ka lënë pas dore sepse nuk imagjinoja dot në jetën time që një personazh që mund të jetë karizmatik në rrjete sociale, mund të krijojë ovacione edhe në publik, për mua s’ka asnjë gjë të keqe, unë e ndjek për vete dhe mund të qesh disi, ta bëni personazh, në qoftë se Rama bëri 1 herë gabim, ju keni bërë 3 herë gabim.
Blendi Fevziu: Për kë e quan se s’po kuptoj?
Anri Bala: Ilir Vrenozin. E nxorrën në sallë aty, ofendoi kryeministrin, kjo nuk ka asnjë problem për të krijuar ovacione, por është turp të vendosësh një personazh që ofendon kryeministrin. E vendos ti, por të paktën lexoje.
