Ndonëse institucioni i futbollit në vendin tonë predikon që klubet nuk duhet të ndryshojnë shpesh zyrtarët, pasi humbet eksperienca e fituar në të shkuarën për zbatimin e rregullores, që klubet duhet t’u qëndrojnë strikt rregulloreve sportive për çështje të caktuara, vetë nuk ka as njohurinë më minimale të neneve që saktësojnë veprimtari të zakonshme në një ndeshje futbolli.
Ankimimi – Ndonëse zyrtarisht nuk ka asnjë reagim nga institucioni i futbollit në vend për atë që ka ndodhur, burime të “Panorama Sport”, pranë FSHF-së bëjnë me dije se po mendohet që federata të ankimojë vendimin e FIFA-s. Ditën e djeshme, në zyrat e institucionit të futbollit është marrë vendimi nga FIFA dhe po mendohet që të përgatitet një dosje për të ankimuar këtë ndëshkim.
Arma mbrojtëse e FSHF-së? FAX-i. Mjeti i komunikimit është arsyeja që pritet të përdorë FSHF-ja për t’u ankuar në FIFA.
Justifikimi – Në institucionin e futbollit në vendin tonë do të përdoret FAX-i si shpëtim në këtë rast. Sipas tyre, në momentin që FIFA ka ndryshime të rregullores, vjen një FAX që njofton për çdo nen të ndryshuar me një interpretim të detajuar. Në këtë rast, federata do të kërkojë të mbrohet me faktin që nuk ka mbërritur FAX-i. Sipas të njëjtave burime në federatë, procedura e UEFA-s është edhe më praktike në raste të ngjashme, pasi UEFA përdor “emailin” (adresë elektronike komunikimi) në çdo moment që sjell rekomandime për rregulloret. Pavarësisht të gjithave, fakti që diçka e tillë i ndodhi Kombëtares U-19 nuk mund të përsëritej në Kombëtaren e madhe që mori pjesë edhe në Europian.
Aq më tepër, kur FSHF-ja paguan fonde që të dërgojë punonjësit e saj në seminare jashtë vendit për të marrë të rejat më të fundit nga praktikat europiane dhe botërore, në lidhje me rregulloret e futbollit dhe organizimin e ndeshjeve apo kampionateve të ndryshme.
Një ndëshkim i tillë, ka bërë xhiron e mediave europiane, ku krahas faktit që Shqipëria ka qenë në Europian, përmendet edhe fakti që në vitin 2016 nuk ka njohuri me rregulloren bazë futbollistike nga një federatë që arkëtoi miliona me anë të suksesit të Kombëtares.
Tre ditë më parë FIFA vendosi që Shqipëria të humbte në tavolinë ndeshjen miqësore me Luksemburgun të luajtur në muajin mars, për shkak se Ergys Kaçe ishte aktivizuar pa qëndruar një ndeshje jashtë fushës, pasi ishte ndëshkuar me karton të kuq ndaj miqësores me Austrinë. Gjithashtu FIFA gjobiti edhe FSHF-në me një shumë prej rreth 7500 frangash zvicerane.
