Komisioni i Ankesave dhe Sanksioneve, në seancën e sotme për ankimin e Partisë Demokratike për qarkun Kukës, shprehet se do të marrë vendimin ditën e nesërme.
Seanca vendimmarrëse do të mbahet në orën 09:50.
Demokratët kanë bërë ankimim për këtë qark, pasi nuk pranojnë rezultatet e zgjedhjeve parlamentare të 11 majit, ndaj dhe kërkojnë përsëritjen e tyre.
Por kërkesa nuk ka pasur vetëm për qarkun Kukës, shkruan tvklan.
Seanca shqyrtuese për qarkun e Shkodrës do të mbahet ditën e hënë, më 9 qershor, ora 10:30.
Ndërsa për qarkun e Lezhës, seanca është shtyrë për ditën enjte, me datë 05.06.2025, në orën 15:00.
Sakaq, më 10 qershor, ora 10:30, do të shqyrtohet kërkesa e demokratëve ndaj qarkut Berat.
Teksa PD-ja nuk pranon rezultatet e zgjedhjeve të 11 majit, disa kandidatë kanë kërkuar rinumërimin e votave, përfshirë Ilir Alimehmeti, Mimoza Hajdarmataj, Lisandër Hoxha dhe Aulon Kalaja.
Berisha shprehet se e mbështet në kërkesën e tyre, por fillimisht duhet që të shpallen të pavlefshme zgjedhjet e 11 majit, për të vijuar më pas me ankesat e demokratëve.
Sipas tij, mbështetja ndaj kandidatëve që kanë kërkuar rinumërimin do të vijë duke respektuar platformën e përcaktuar nga Partia Demokratike, në përputhje me ligjin elektoral.
Kujtojmë se 229 kuti të materialeve zgjedhore në rang vendi, ku në procesverbal nuk është shënuar numri i fletëve të votimit të papërdorura më 11 maj, do të rihapen.
Kutitë do të hapen në Vaqarr, në magazinat e KQZ-së, dhe forcat politike mund të kenë vëzhguesit e tyre për të ndjekur të gjithë numërimin e fletëve të papërdorura.
