Giani De Biasi nuk ia ka dalë të shpallet kampion në anketën e zhvilluar nga “Gazzeta Dello Sport”, mbi trajnerin më të mirë në Itali gjatë vitit 2015. Trajneri i Kombëtares së Shqipërisë është renditur i dyti në krah të trajnerit të Kombëtares së Italisë Antonio Konte dhe Romeo Saketin me 15 përqind të votave.
I pari në këtë sondazh doli Mauricio Sarri, i cili aktualisht drejton Napolin. Megjithatë, trajneri i Kombëtares nuk ka harruar të falënderojë të gjithë lexuesit e ‘Gazzetta dello Sport’ që e mbështetën në këtë garë.
“I falënderoj të gjithë ata që me mbështetën dhe ndihmuan në këtë garë. Sa keq që nuk arritëm suksesin për pak!!! Mbetet kënaqësia që u bëra pjesë e kësaj liste prestigjioze. Ajo që arritëm së bashku me lojtarët dhe stafin, ishte diçka e jashtëzakonshme! Ju falënderoj nga zemra të gjithëve!” – shkruan De Biasi në një mesazh në profilin e tij në Facebook.
