Trafiku i klandestinëve nga Afrika për në Europë duket se ka qenë shkaku kryesor i bllokimit të anijes shqiptare nga autoritetet libiane. Kështu deklaron pronari i saj, Eduart Skora. Sipas tij, anija ishte nisur nga Durrësi për në Maltë, ku ishte furnizuar me karburant më pas ishte drejtuar për në Libi për të marrë ngarkesën, por në kthim është bllokuar.
Ai u shpreh se ka komunikuar me njërin nga pjesëtarët shqiptar të ekuipazhit, Artur Selimanj i cili i ka pohuar se në anije kishin hipur refugjatë, ndërsa pas kontrollit janë ndaluar nga autoritetet libiane.
“Kemi hyrë në port në datë 10, në 3 ditë është ngarkuar, në 14 u nis drejt Maltës. Në datë 15, kthehet përsëri në Libi, unë e konstatoj në orën 07:00 të mëngjesit. Mendova se ka ndonjë defekt. Nuk kisha mundësi komunikimi. Anija nuk përgjigjej. Lajmërohej kontrollin e Tripolit.
Pasi kemi punuar për kohë të gjatë kur kemi çuar çimento nga Shqipëria. Më njoftoi një person që anija juaj është kthyer pas dhe nuk dihet nëse anijen e ka marrë shteti apo banditë që e shfrytëzojnë për të futur refugjatë. Kam folur me drejtoreshën e kufirit, shkova në drejtorinë e portit Durrës dhe bëra të gjitha deklaratat.
Duke qenë aty më merr një pjesëtar i ekuipazhit, Artur Selimanj, (e bëra telefonin me zë të lartë) më tha: “Kishin hipur shumë refugjatë në anije, shteti i Libisë i zbriti dhe tani kanë prurë polici të vërtetë, ne jemi shumë mirë me shëndet. Kanë dëmtuar anijen. Tani pretendojnë se anija ka marrë rërë kontrabandë” ka thënë Eduart Skora për ReportTv.
Pesë marinarët shqiptarë qendrojnë nga e premtja të ndaluar në një port të Libisë së bashku me kapitenin dhe dy marinarë malazezë. Anija “Envi 1” me flamur Panamez u ndalua në portin e Zoura, nga rojet bregdetare të ushtrisë libiane. Në bord ndodhen 5 marinarët shqiptarë, Maliq Bushati, Avni Buzi, Artur Selimaj, Xhodet Çelaj dhe Jurgen Balla.
Kapiteni dhe dy drejtuesit e tjerë janë shtetas malazezë. Sipas njoftimit nga autoritet e Libisë, ajo dyshohet se tranportonte mallra kontrabandë pasi ishte ngarkuar në mënyrë të paligjshme me rërë dhe zhavorr që përdoret si material ndërtimi.
Anija “Envi 1”, është e specializuar për transportin e mallrave. Ajo është pjesë e kompanisë” Delmore Ventures Ltd”, me qendër në portin e Durrësit.
