Gjyqtarja e Gjykatës së Posaçme Kundër Korrupsionit dhe Krimit të Organizuar, Marsela Balili është shkarkuar nga detyra nga Komisioni i Pavarur i Kualifikimit (KPK).
Gjatë seancës së mëparshme kur u bë vlerësimi i figurës së saj, Balili bëri kërkesë për riçeljen e hetimit, por trupa gjykuese vendosi ta rrëzojë kërkesën e saj në këtë fazë të procesit.
ILDKPKI kishte dorëzuar në Komision një raport me konstatimin se deklarimi i pasurisë nuk është i saktë dhe në përputhje me ligjin. Sipas këtij raporti, gjyqtarja Balili ka kryer fshehje të pasurisë dhe deklarim të rremë.
Kjo është hera e dytë që Balili pezullohet nga detyra, pasi me vendim të ish-Këshillit të Lartë të Drejtësisë ajo u shkarkua edhe në vitin 2009. Prokuroria nisi asokohe një procedim penal ndaj saj dhe bashkëshortit, prokurorit Aleksandër Plepi, për veprën penale të korrupsionit.
Në fund të procesit, bashkëshorti i saj u dënua me një vit burg ndërsa Balili u shpall e pafajshme dhe u rikthye në sistemin e drejtësisë pas 8 vitesh në Gjykatën e Krimeve të Rënda me vendim të Këshillit të Lartë të Drejtësisë .
Pas shkrirjes së kësaj gjykate, ajo u caktua përkohësisht anëtare e Gjykatës së Posaçme./Opinion.al
