Kreu i Partisë Demokratike, Sali Berisha ka komentuar deklaratat e shefes së politikës së jashtme në BE, Kaja Kallas në konferencë me kryeministrin Edi Rama ku kanë folur lidhur me anëtarësimin në BE.
Në një deklaratë nga selia blu, Berisha u shpreh se Kallas “u tha shqiptarëve që nuk ka punë me ato që thotë Rama”.
Më tej, ai theksoi se nëse PD vjen në pushtet do ndërmarrë çdo reformë, do miratojë çdo ligj, çdo vendim për të kapur çdo standard dhe çdo kriter që kërkohet për anëtarësimin e Shqipërisë në BE.
”Zonja Kallas tha se Shqipëria ka ambicie, që është mashtrim i Edi Ramës, por kjo është një rrugë e vështirë që do reforma. Ajo nuk investoi asnjë nonagram në zotimet e Ramës. I tha edhe tjetrën që është rrugë gjithëpërfshirëse.
Rama u përpoq ta asociojë mashtrimin e tij me praninë e përfaqësueses së lartë të politikës së Jashtme të BE zonjës Kallas, por ajo mbajti vendin e vet dhe qëndrimin e vet.
Ajo u tha shqiptarëve që ‘ unë nuk ka punë me ato që thotë ky’, ato janë ambiciet e tij, mashtrimet e tij, por s’mund ta thoshte mashtrime se e kishte ne krah.
PD ka deklaruar dhe deklaron se ylli polar do jetë integrimi i Shqipërisë në BE, i bazuar në reforma dhe meritë. PD në pushtet do ndërmarrë çdo reformë, do miratojë çdo ligj, çdo vendim për të kapur çdo standard dhe çdo kriter që kërkohet për anëtarësimin e Shqipërisë në BE. PD e shpall integrimin si interesin tonë kombëtar, si yllin polar të programit”, tha Berisha.
