Jehona e kualifikimit të Shqipërisë në Europian oshtin ende. Skuadra e drejtuar nga Xhani De Biazi vijon të përshkruhet si një nga surprizat më të bukura që kishte edicioni i fundit i kualifikueseve.
“Kuqezinjtë do të jenë debutues në ‘Francë 2016’ dhe do të përjetojnë një ëndërr për të cilën kanë pritur afërsisht 60 vjet që nga ndeshja e parë zyrtare prej të cilës numërojnë 49 fitore, 48 barazime dhe 137 humbje, me një statistikë prej 203 golash të shënuar dhe 411 të pësuar.
Të besuarit e Xhani De Biazit do të debutojnë në Grupin A kundër Zvicrës, të shtunën e 11 qershorit në Lens. Më pas do të sfidojnë ‘gjelat’ katër ditë më vonë në Marsejë dhe në fund Rumaninë të dielën e datës 19 në Lion.
Pikërisht këtu fillon edhe ‘anekdota’ e Shqipërisë. Skuadra e udhëhequr në fushë nga kapiteni Cana do të kërkojë që të shpërblejë trajnerin në një ditë të veçantë për të.
De Biazi feston 60-vjetorin një ditë pas ndeshjes me Francën dhe të besuarit e tij do të provojnë me çdo kusht që t’i japin atij një arsye më shumë për të festuar.
Në edicionin e 15-të të kampionatit europian, ‘skuadra e shqiponjave’ do të kërkojë të përjetojë anekdotën më të bukur. E pamundur? Nisur nga fitorja historike e 7 shtatorit 2014 në Aveiro kundër Portugalisë, apo nisur nga fakti që lanë pas Danimarkën, Serbinë dhe Armeninë nuk mund të thuash ashtu.
Me shumë lojtarë si Hysaj, Lenjani, Xhaka e Berisha, kjo skuadër do të provojë mundësitë për t’i bërë një dhuratë trajnerit De Biazi”, shkruan “RTL.fr”
