Carlo Ancelotti është prezantuar zyrtarisht si trajneri i Real Madrid. Tashmë tekniku italian ka firmosur një kontratë 3-vjeçare me “Los Blancos”, të cilët i drejtoi me sukses në vitet 2013-2015.
61-vjeçari tha gjatë konferencës së prezantimit se Real Madrid është shtëpia e tij, pasi dhe tifozët e duan prej faktit që ishte ai që solli suksesin e dhjetë në Champions League.
“Dua të falënderoj presidentin dhe të gjithë drejtuesit që më deshën sërish këtu. Jam shumë i lumtur që u riktheva, kjo është shtëpia ime dhe të gjithë energjinë që kam do e ve në dispozicion për të tentuar të përsërisim atë që kemi bërë më parë së bashku.
Kam kujtime të shkëlqyera nga dy vitet që kalova këtu. Jo vetëm për titujt e fituar, por edhe për raportet që krijuam me njëri-tjetrin. Unë e di se çfarë do të thotë të jesh trajner i Real Madrid, e bëj me shumë entuziazëm këtë punë dhe do të synoj të bëj më të mirën time“.
Më pas një koment për merkaton. Ëndrra e madhe quhet Kylian Mbappe, por Ancelotti komenton edhe të ardhmen e kapitenit Sergio Ramos. “Më duhet të bisedoj me drejtuesit e klubit, por do të synojmë të garojmë me kontingjentin më të mirë të mundshëm.
Lojtarët cilësorë të japin gjithnjë e më shumë mundësi për të triumfuar, por nuk duhet harruar që kolektivi është kryesori, edhe pse dihet, individët kanë rëndësinë e tyre të madhe. Sergio Ramos? E përsëris, do të bisedoj me drejtuesit në fillim, pasi nuk jemi ulur të flasim gjerë e gjatë.
Stili i lojës?
Historia e Real Madrid është e lidhur me një futboll sulmues, spektakolar dhe plot intensitet. Futbolli ka ndryshuar disi që kur u largova unë gjashtë vite më parë, por ideja mbetet e njëjta. Reali im do të jetë ofensiv dhe spektakolar“, theksoi trajneri italian.
