Dy humbjet përballë Arsenalit dhe eliminimi i parakohshëm nga Champions League kanë shënuar fatin e Carlo Ancelotti. Pavarësisht se ka ende një vit të mbetur në kontratën me Realin e Madridit, e ardhmja duket e vendosur.
Trajneri italian do të largohet brenda muajit Prill. Sipas anglezes Sky Sports, 65-vjeçari do ta drejtojë ekipin deri në finalen e Kupës së Mbretit kundër Barcelonës, që do të luhet më 26 Prill.
Me distancën nga katalanasit kryesues në kampionat që është 4 pikë, ky duket trofeu me të cilin Reali do të provojë disi të shpëtojë sezonin. Pas finales, pavarësisht asaj që ndodh, Ancelotti nuk do të jetë më në krye të stolit.
Atë e pret përfaqësuesja e Brazilit. Federata e vendit latin synon që të firmosë kontratën me trajnerin përpara mbylljes së sezonit në Spanjë.
Me sezonin e dështuar te Reali, edhe Ancelotti është bindur se cikli i tij në Bernabeu përfundoi.
Kandidatët për ta zëvendësuar në Madrid janë Xabi Alonso, Zinedin Zidan dhe Jurgen Klop.
