Lulzim Basha doli në një konferencë për mediat këtë të enjte, ku reagoi edhe njëherë për amnistinë penale.
Basha deklaroi se shpreson që amnistia të mos shndërrohet në një pazar për të tentuar për të blerë vota nga radhët e opozitës, ndërsa theksoi se grupi i tij mund të votojë pro nëse hiqen propozimet nga të cilat përfitojnë zyrtarët e korruptuar dhe nësë përfitojnë nga amnestia protestuesit e opozitës.
“Edhe këtë të enjte aktet qeveritare u miratuan për 8 minuta dhe u bllokua çdo hapësirë për opozitën për të bërë detyrën e saj për transparencën dhe gozhdimin e aferave qeveritare. Pas seancës, dëgjuam një deklarim të qeverisë se përse u tërhoq amnistia nga rendi i ditës. Shpresoj të ketë qenë pjesë e gënjeshtrave dhe që nuk do ta shndërrojnë amnistinë në pazar të gjësë së gjallë për të peshkuar vota. Nëse vërtetë duan të kenë një përqasje humanitare për amnistinë, rruga është e thjeshtë. Së pari të hiqen propozimet për të përfituar zyrtarët e korruptuar dhe së dyti në amnisti të përfshihen ata që zvarriten gjyqeve si protestuesit e Astirit, Bregut të Lumit, që u ngritën në protesta për të mbrojtur pronën e tyre, por dhe atyre që protestuan kundër vjedhjes së zgjedhjeve. Këtë e kemi si kusht dhe nuk ka tërheqje. Ky është qëndrimi ynë”,- tha Basha.
