Qelitë në burgjet e Shqipërisë, duke filluar nga sot, do të jenë më pak të mbipopulluara. Rreth 720 të dënuar do të lirohen pas hyrjes në fuqi të ligjit “Për dhënie amnistie”. Nisma e mazhorancës finalizohet sot në të gjitha institucionet e vuajtjes së dënimit, të cilat kanë përpiluar listat përkatëse të të dënuarve që lirohen. Mësohet se, numrin më të madh të të liruarve do ta ketë burgu i ri i Fierit, nga i cili do të lënë qelinë rreth 150 të burgosur. Në këtë institucion do të lëshohen edhe mesazhet nga ministri i Drejtësisë dhe nga krerët e burgjeve, duke iu kërkuar të liruarve që të mos kryejnë më vepër penale. Ndërkohë, do të ketë lirime masive edhe të të moshuarve apo të të miturve.
Kush përfiton
Në ligjin për dhënie amnistie përfitojnë personat e dënuar me burgim deri në dy vjet, personat e dënuar me kusht, me gjobë apo personat, për të cilët gjykata ka caktuar një nga llojet e alternativave të dënimit me burgim, për dënime të dhëna deri në datën e hyrjes në fuqi të këtij ligji (sot më 21 janar 2016) pavarësisht prej kohës së mbetur nga dënimi. Në ligj, që hyn sot në fuqi, përfitojnë edhe personat e dënuar me vendim të formës së prerë, me: kusht, me gjobë (për pjesën financiare të pashlyer të dënimit deri në momentin e hyrjes në fuqi të këtij ligji) ose personat për të cilët gjykata ka caktuar një nga llojet e alternativave të dënimit me burgim”.
Ndërkohë, përfitojnë femrat që, në ditën e hyrjes në fuqi të këtij ligji, janë baras ose mbi moshën 50 vjeç apo meshkujt mbi moshën 60 vjeç. Do të lirohen personat e dënuar me burgim, të cilët në kohën e kryerjes së veprës penale, kanë qenë baras ose nën moshën 18 vjeç.
Ligji ka të përcaktuar edhe personat që përfitojnë ulje dënimi. Ligji parashikon se të gjithë personat e dënuar, të cilët nuk përfitojnë nga parashikimi i nenit 3, u amnistohet 1.5 vjet, për personat e dënuar gra dhe personat që në kohën e kryerjes së veprës penale kanë qenë të mitur ose 1 vit për personat e dënuar burra. Përjashtohen nga amnistia veprat penale të parashikuara në nenin 5, që janë vepra penale me rrezikshmëri të lartë shoqërore dhe për këtë qëllim.
Dhënia e amnistisë
Në një intervistë për “Shqip” të para pak ditësh, drejtori i Burgjeve, Artur Zoto, tha se amnistia u realizua nga ministri i Drejtësisë, nisur nga fakti se mbipopullimi përmendej si problem për sistemin penitenciar. Sipas tij, amnistia është heqja dorë e shtetit nga ndjekja penale, e cila ka si qëllim jo vetëm uljen e mbipopullimit, por respektimin e dinjitetit njerëzor për këta persona, detyrim që rrjedh si nga Konventa Europiane për të Drejtat e Njeriut, Rregullat Bazë të Kombeve të Bashkuara për Burgjet, ashtu edhe legjislacioni vendas. “Në këtë kuptim, është një nismë e cila do të ketë impakt tek ulja e mbipopullimit, pasi nga zbatimi i ligjit përfitojnë 720 të dënuar, ku momentalisht mbipopullimi është në të njëjtën shifër.
Amnistia që u bë këtë vit kishte ngjashmëri me atë të prillit të 2014-s, por kufizonte kategorinë e personave përfitues, që do të thotë se të paraburgosurit nuk janë subjekt i ligjit të Amnistisë që do të aplikojmë më 21 janar të 2016”, – tha Zoto. Ai shpjegoi se në momentin e draftimit, ashtu edhe gjatë ndryshimeve që u bënë në seancën plenare, nuk ishte parashikuar përfitimi i saj për të paraburgosurit, pasi ata ishin subjekt i amnistisë që u bë në vitin 2014. Rrjedhimisht, nëse do të ishte parashikuar edhe në këtë ligj, atëherë ndjekja penale si koncept do të zbehej dhe mund të cenonte parimet e saj. /gazeta Shqip/
