Kuvendi i Shqipërisë pritet të miratojë një amnisti të përgjithshme për të burgosurit shqiptarë para festave të fundvitit.
Sipas vetë projektligjit të zbardhur sot “Per dhenie amnistie” 2015, grave të dënuara që nuk përfitojnë amnisti nga ky projektligj, do t’u ulet dënimi me 1.5 vite burg.
Po kështu edhe për të gjithë personat e dënuar burra, që nuk përfitojnë nga kriteret për të përfituar amnisti këtë vit, do t’u ulet dënimi me 1 vit.
“Të gjithë personat e dënuar, të cilët nuk përfitojnë nga kriteret e vendosura për përfitimin e amnistisë dhe kritereve ndaluese të parashikuara në nenin 5 të këtij ligji, u amnistohet:
- a) 1.5 vjet, për personat e dënuar gra dhe personat që në kohën e
kryerjes së veprës penale kanë qenë të mitur.
- b) 1 vit për personat e dënuar burra.”, thuhet në nenin 4 të këtij
projektligji.
Kriteret për përfitimin e amnistisë
Plotësojnë kriteret për të përfituar amnisti, sipas këtij ligji:
- a) personat e dënuar me burgim deri në 2 vjet, personat e dënuar me kusht, me gjobë apo personat, për të cilët gjykata ka caktuar një nga llojet e alternativave të dënimit me burgim, për dënime të dhëna deri në datën hyrjes në fuqi të këtij ligji, pavarësisht nga koha e mbetur nga dënimi, me përjashtim të personave të dënuar për veprat penale të parashikuara në nenin 5, të këtij ligji;
- b) personat e dënuar me vendim të formës së prerë, me kusht, me gjobë (për pjesën financiare të pashlyer të dënimit deri në momentin e hyrjes në fuqi të këtij ligji), apo personat, për të cilët gjykata ka caktuar një nga llojet e alternativave të dënimit me burgim, me perjashtim të personave të dënuar për veprat penale, të parashikuara në nenin 5, të këtij ligji;
- c) personat e dënuar me burgim, të cilëve, që në ditën e hyrjes në fuqi të këtij ligji, u kanë mbetur pa vuajtur nga ky dënim deri në 2 vjet, me përjashtim të personave të dënuar për veprat penale, të parashikuara në nenin 5, të këtij ligji;
- d) personat e dënuara femra, që, në ditën e hyrjes në fuqi të këtij ligji, janë baras ose mbi moshën 50 vjeç, me përjashtim të personave të dënuar për veprat penale, të parashikuara në nenin 5, të këtij ligji;
- e) personat e dënuar meshkuj, që në ditën e hyrjes në fuqi të këtij ligji janë baras ose mbi moshën 60 vjeç, me përjashtim të personave të dënuar për veprat penale, të parashikuara në nenin 5, të këtij ligji;
- f) personat e dënuar me burgim të cilët në kohën e kryerjes së veprës penale, kanë qenë baras ose nën moshën 18 vjeç, me përjashtim të atyre, që janë dënuar për vepra penale, të parashikuara në nenet 76, 77, 78, 78/a, 79, 79/a, 79/b, 79/c, 81, 101, 103, 104, 139, 140 e 141, të Kodit Penal.
Amnistia do të prekë një numër të konsiderueshëm të dënuarish dhe pritet të këtë efekte direkte në uljen e mbipopullimit në burgje.
Lirimet nga qelia të të burgosurve që do të përfitojnë nga amnistia e përgjithshme e fundvitit, pritet të ndodhin pas datës 31 dhjetor. Fakti është pohuar nga vetë Drejtori i Përgjithshëm i Burgjeve, Artur Zoto. (Panorama)
