I ftohti polar që ka gjunjëzuar kryesisht pjesën veri perëndimore të Shteteve të Bashkuara të Amerikës ka shkaktuar të paktën 21 viktima.
“Reuters” raporton se miliona amerikanë po përjetojnë ato që mund të jenë ndoshta temperaturat më të ulëta të regjistruara ndonjëherë, e që arrijnë deri në minus 49 gradë celcius, ndërsa të gjithë vendet e prekura nga ky i ftohtë arktik duket se janë “paralizuar”.
I ftohti polar i ka izoluar njerëzit në shtëpi, ndërsa shkollat e universitetet janë mbyllur, e mijëra fluturime janë anuluar. Spitalet janë të tejmbushura me pacientë ndërsa ekipet e emergjencës edhe pse janë në gatishmëri, hasin vështirësi sepse ka probleme të mëdha në transport dhe në aeuroporte.
Autoritetet përsërisin vazhdimisht për qytetarët paralajmërime për rrezikun e madh që vjen nga i ftohti si aksidente në rrugët e mbuluara nga akulli, ngrirje e organeve të brendshme, sulm në zemër.
Illinoisi, Michigani dhe Wisconsin kanë shpallur ndërkohë gjendjen e jashtëzakonshme. Në Chicago, termometri shkoi deri në minus 29 gradë Celsius, ndërsa në Wisconsin, minus 34 gradë Celsius./E.M
