Ministri i Brendshëm i Kosovës, Xhelal Sveçla ka zhvilluar një takim me Shefen e Operacioneve të Divizionit për Operacione të NATO-s, Ariella Viehe.
Këtë lajm e ka bërë të ditur vetë Sveçla përmes një postimi në rrjete sociale, ku shkruan se me Viehen ka biseduar për situatën aktuale të sigurisë në Kosovë, veçanërisht në veriun e vendit.
Ai thekson se kërcënimet e vazhdueshme të Serbisë dhe ambiciet e saj territoriale për Kosovën vazhdojnë të përbëjnë problem serioz për Kosovën por edhe të rajonit.
“Kisha kënaqësinë të mirëpres sot në Ministrinë e Punëve të Brendshme Shefen e Operacioneve aktuale, Divizioni për Operacione i Shtabit të Përgjithshëm të NATO-s znj. Ariella Viehe.
Biseduam mbi situatën aktuale të sigurisë në Kosovë, veçanërisht në veriun e Kosovës.
Sulmet e njëpasnjëshme viteve të fundit ndaj institucioneve tona dhe zyrtarëve tanë në veriun e Kosovës si dhe sulmi terrorist i 24 shtatorit ishin çështjet e rëndësishme për të cilat biseduam me znj. Viehe, poashtu edhe për bashkëpunimin dhe bashkëveprimin e mirë e të vazhdueshëm mes KFOR dhe Policisë së Kosovës. Me këtë rast, u dakorduam për bashkëpunim të mëtejmë të institucioneve tona dhe misionit të KFOR.
Kërcënimet e vazhdueshme të Serbisë dhe ambiciet e saj territoriale për Kosovën vazhdojnë të përbëjnë problem serioz për Kosovën por edhe të rajonit.
Kosova aspiron rrugën drejt integrimit në NATO dhe në këtë kuptim, do të vazhdojmë përpjekjet tona si partner serioz në garantimin e sigurisë në vend dhe në rajon”, shkruan Sveçla.
