Ambasadorja e Zvicrës në Shqipëri, Ruth Huber, vlerësoi krijimin e portalit të ri të legjislacionit elektronik, duke e konsideruar si një arritje të madhe për Kuvendin dhe për vendin në tërësi. Në një deklaratë gjatë ceremonisë zyrtare, ambasadorja theksoi rëndësinë e kësaj nisme në rrugën drejt qeverisjes së mirë dhe afrimit me Bashkimin Europian.
“Jam e kënaqur që po festojmë së bashku këto arritje të mëdha. Ky portal i legjislacionit elektronik shënon kurorëzimin e mbështetjes sonë afatgjatë për Kuvendin nëpërmjet partnerëve në OSBE. Puna jonë e përbashkët ka arritur më shumë se një sukses teknik dhe ka hapur tashmë një kapitull të ri për ligjbërjen në Shqipëri,” u shpreh Huber.
Diplomatja zvicerane theksoi se digjitalizimi nuk është vetëm një aspekt teknik, por një mjet real për të rritur transparencën, llogaridhënien dhe për t’i afruar institucionet me qytetarët.
“Qëllimi ynë i përbashkët është që Shqipëria të arrijë qeverisjen e mirë dhe institucione demokratike mirëfunksionale. Në fund të fundit, kjo i mundëson qytetarëve të kenë më shumë besim dhe të jenë më të angazhuar.”
Ambasadorja vlerësoi gjithashtu kohën kur ky projekt po realizohet, në një moment thelbësor për integrimin europian të Shqipërisë. Ajo nënvizoi se kapitulli i dhjetë i negociatave për anëtarësim në BE përfshin median dhe shoqërinë e informacionit, duke e bërë këtë investim në infrastrukturë digjitale një hap të natyrshëm dhe të domosdoshëm drejt standardeve të BE-së.
“Portali i ri i legjislacionit elektronik në Shqipëri është një hap i rëndësishëm drejt transparencës dhe llogaridhënies. Vjen në një moment thelbësor për Shqipërinë, kur mundësia për t’u bashkuar me Bashkimin Europian duket e arritshme dhe pranë. Kapitulli i dhjetë i paketës së negociatave përfshin median dhe shoqërinë e informacionit. Duke investuar në këtë infrastrukturë digjitale, Kuvendi i Shqipërisë po i afrohet standardeve evropiane mbi të dhënat e hapura dhe transparencën.”/tvklan.al
