Ambasadorja e sapo-emëruar e Shqipërisë pranë Selisë së Shenjtë, zonja Majlinda Frangaj, ka dorëzuar letrat kredenciale në një ceremoni të posaçme tek Ati i Shenjtë, Papa Françesku.
Ambasadorja Frangaj, është kreu i pestë i Ambasadës së Shqipërisë në Vatikan, që prej vendosjes së marrëdhënieve diplomatike mes dy vendeve në fillim të viteve ’90.
Gjatë takimit me Ambasadoren Frangaj, Papa Françesku i rikonfirmoi ndjenjën e veçantë që ai ka për shqiptarët dhe i premtoi mundësinë për një vizitë të dytë të mundshme të tij në tokën shqiptare.
Ndërsa Ambasadorja e Shqipërisë pranë Selisë së Shenjtë, Majlinda Frangaj e falenderoi Atin e Shenjtë për vëmendjen e veçantë dhe të vazhdueshme që ai ka për popullin shqiptar si dhe zhvillimet në Shqipëri.
Një takim të veçantë ambasadorja Frangaj, pati edhe me Sekretarin e Shtetit të Vatikanit kardinal Pietro Parolin, me të cilin ndanë dëshirën dhe vullnetin për të vijuar bashkëpunimin e mirë të deritanishëm.
