Ambasadorja franceze, Christina Vasak ka zgjedhur festën kombëtare të Francës për të shprehur distancimin nga zgjedhjet e 30 qershorit.
Ajo tha se “më 30 Qershor, qeveria zhvilloi zgjedhje të çuditshme lokale”, teksa shtoi se “të rinjtë po ikin nga Shqipëria dhe shumë të tjerë duan të ikin. Kam vënë re që kryeministri nuk është i shqetësuar për këtë situatë. Shumë të rinj nga e gjithë Europa lëvizin, por, ndryshe nga të tjerët, të rinjtë shqiptarë nuk duan të kthehen më në vendin e tyre. Kjo nuk është diçka e mirë”.
Kjo deklaratë e ambasadores së Francës në Tiranë vjen në 230 vjetorin e ditës së Bastijës, festë kombëtare në Francë, që festohet çdo 14 korrik, për të përkujtuar marrjen e Bastijës, një fortese mesjetare në qendër të Parisit, që simbolizonte autoritetin e Mbretit Luigji XVI, në 14 korrik 1789. Edhe pse në momentin e marrjes në kontroll nga forcat revolucionare, në godinë kishte vetëm 7 të burgosur, kjo ngjarje konsiderohet gjerësisht si një pikë kthese e Revolucionit Francez dhe predikon trinomin e famshëm “liri-barazi-vëllazëri”./Opinion.al
