Mëngjesi i 21 prillit nisi me një lajm të trishtë për mbarë botën: ndarjen nga jeta të Papa Françeskut. Ati i Shenjtë ndërroi jetë në moshën 88-vjeçare në Romë, në Casa Santa Marta, ku ishte transferuar pasi ishte shtruar në spitalin Gemelli.
Të dielën e Pashkëve ai u shfaq në ballkonin e Bazilikës së Shën Pjetrit për të uruar besimtarët për festën e Pashkëve. Por për shkak të gjendjes së tij të rënduar shëndetësore, mesazhin e lexoi një ndihmës i tij.
Për të përshkruar më nga afër këtë ngjarje të trishtë, programi “Rudina” në Tv Klan realizon një lidhje të drejtpërdrejtë me ambasadoren e Shqipërisë në Vatikan, Majlinda Frangajn. Ajo shprehet se ngjarja ishte e papritur dhe ka qenë e vështirë për t’u besuar, sidomos pas shenjave të mira që po shfaqte kryepeshkopi i Romës.
Majlinda Frangaj: Unë…kur mora lajmin nuk e besova të them të drejtën sepse dje siç e thatë Papa dha urimin e Pashkëve dhe unë isha aty prezente kështu që pritëm momentin kur ai do të dilte te dritarja që të bënte urimin, por për surprizë edhe të besimtarëve në sheshin e Shën Pjetrit ai doli dhe vizitoi, bëri xhiro me Papa Mobile. Dukej i lodhur por nuk besuam, asnjë që kemi biseduar deri më tani nuk pritej të paktën në këto momente sepse ne e dimë që Papa ka qenë i shtruar në spitalin Gemelli që më 14 shkurt, por dukej sikur po e merrte veten. Filloi të bënte ca takime, priti mbretin e Britanisë së Madhe, priti zv/presidentin e Amerikës, doli dhe përshëndeti të dielën e kaluar, doli dje. Sot në mëngjes doli lajmi i trishtë.
Siç dihet, Papa Françesku u shtrua në spital për shkak të pneumonisë së dyfishtë. Majlinda Frangaj shton se ka gjasa që komunikimi zyrtar për shkaqet të vijojë mbrëmjen e sotme.
Majlinda Frangaj: Dihet që Papa nuk ishte mirë, por shkaqet e vdekjes mendohen të jetë një hemorragji cerebrale.. Sot në orën 20:00 ka mundësi të jepen shkaqet zyrtare. Në ambasadë nuk ka ardhur një komunikim zyrtar për të shpjeguar më hollësishëm. Thjesht ka ardhur ky komunikimi që selia mbeti vakante dhe Papa u nda nga jeta. Në ditët në vijim do të kemi më shumë informacione, por zyrtarisht vetëm ky informacion ka mbërritur në ambasadë.
