Kriza politike në Shqipëri, sipas ambasadorit spanjoll Vicente Canelles Montero, mund të zgjidhet vetëm nga brenda duke patur parasysh respektimin e Kushtetutës.
Diplomati Montero foli nga Korça për situatën në vend duke vënë theksin tek dialogu mes palëve dhe respektimi i ligjeve dhe Kushtetutës.
“Është e vërtetë që situata politike në Shqipëri është e tensionuar por nuk janë ambasadorët e huaj ata që mund të vendosin sesi mund të kapërcehet kjo gjë. Vetëm shqiptarët mund të vendosin, sigurisht duke respektuar ligjin, shtetin e të drejtës, kushtetutës. Jeni ju ata që duhet të vendosni sesi mund të dilni nga ky moment i vështirë”, deklaroi Montero.
Ambasadori solli në vëmendje eksperiencën nga Spanja për raste të ngjashme dhe u shpreh se ambasadorët nuk duhet të ndërhyjnë në punë e brendshme të vendit.
“Në Spanjë kur kemi hasur momente të tilla të vështira ato janë zgjidhur me dialog dhe me të gjitha palët politike të cilat janë treguar të gatshme për të hequr dorë nga disa këndvështrime fillestare dhe për të gjetur një pikë dakordësimi mes tyre. Për mendimin tim ne të huajt jemi këtu vetëm për të vëzhguar situatën dhe për të shpresuar për më të mirën dhe nuk besoj se ambasadorët duhet të ndërhyjnë në punët e brendshme të vendit”, tha ambasadori spanjoll.
Në lidhje me Gjykatën Kushtetuese, Montero tha se duhet një zgjidhje e shpejtë pasi kjo gjë komplikon rrugëtimin drejt BE sipas tij.
“Këto janë vështirësi që duhet ti zgjidhni. Është një vështirësi dhe shpresojmë që do të zgjidhet shpejt. Duhet të gjendet një zgjidhje dhe pa kaluar shumë kohë madje. Spanja ka qenë gjithmonë pozitive sa i takon perspektivës së Shqipërisë për në BE dhe vazhdojmë të jemi me këtë qëndrim por Shqipëria duhet fillimisht të zgjidhë problemet e saj sepse një situatë kaq e vështirë komplikon rrugëtimin drejt BE por shpresojmë që kur të vijë momenti i duhur zgjidhja do të jetë e përshtatshme”, deklaroi ambasadori spanjoll Montero. /Opinion.al
