I ftuar mbrëmjen e djeshme në emisionin “Opinion”, ambasadori italian Alberto Cuttillo ka komentuar gjatë intervistës me gazetarin Blendi Fevziu, edhe protestën e studentëve.
Ambasadori italian ka shprehur një admirim të veçantë për protestën e zhvilluar nga studentët, sidomos për kurajon që ata kanë treguar, duke u përçuar një mesazh të rëndësishëm politikës në vend.
“Z.Ambasador, studentët kanë zënë faqet e para të shtypit ose lajmet e para të edicioneve informative në Shqipëri dhe jashtë saj, e keni ndjekur grevën e studentëve?
-Po. E kam ndjekur me interes të madh dhe më lejoni ta them me admirim për kurajën që kanë treguar këta studentë. Mendoj se kanë shprehur ndjenja të forta me vendosmëri për muaj të tërë.
Na kanë dhënë një mësim të mirë të gjithëve, edhe politikanëve në veçanti.
-Mendoj se po. Shpresoj që politika t’i dëgjojë sepse mesazhi që ata përcjellin ka të bëjë me të ardhmen e vendit dhe është në interesin e të gjithëve. Madje edhe profesorët po i bashkohen protestës. Pra, me sa duket, nuk është opinioni vetëm i studentëve, por është e rëndësishme që të gjithë të bëhen bashkë për të zgjidhur problemet e universitetit shqiptar.
Ambasadori Cutillo, ka folur po ashtu edhe për vendin e rëndësishëm që shteti italian u ka dhënë studentëve shqiptarë në universitetet italiane. Madje që ky numër është i barabartë me një vend si Kina.
“Z. Amdasador, Shqipëria ka një lidhje të fortë me Italinë, ndërkohë që nuk e ka me vendet e tjera. Sa studentë shqiptarë studiojnë në Itali në këtë vit shkollor?
-Janë shumë, janë komuniteti i huaj më i madh në numër, janë thuajse…
Zë vendin e parë nga komunitetet e huaja në Itali?
-Po. Konkuron me Kinën, kjo për të ilustruar sa të shumtë janë. Një vend që….
-Nuk e konkurrojmë dot kurrë Kinën.
-Janë afërsisht 10 mijë, por duhet të përmendim faktin që pjesa më e madhe jetojnë në Itali. Janë rezidentë atje.
Eshtë e vështirë të dallosh sa janë, por mund të them se vitin e kaluar nga Tirana dhe Vlora kemi dhënë njëmijë viza studimi.
Nëse këtë e shumëzojmë për tre apo katër vjet pasi është kohëzgjatja mesatare e studimeve, janë 3 ose 4 mijë.
-Janë 4 ose 5 mijë studentë që shkojnë nga Shqipëria.
-Po, janë studentë shqiptarë që studiojnë në Itali. E bëjnë pasi ne kemi edhe një sistem me të cilin mbështetim studentët që kanë të ardhura familjare të pamjaftueshme dhe kjo aplikohet për të gjithë studentët, qofshin këta italianë, shqiptarë apo të nënshtetësive të tjera, dhe besoj se edhe statistikat e kanë të vështirë ta përcaktojnë. Thuajse 80 përqind e këtyre studentëve përfitojnë bursa studimi. / Opinion.al
