Ambasadori holandez, Reinout Vos ka komentuar dy samitet që u zhvilluan në Tiranë dy ditë më parë, për Ukrainën dhe BE-Ballkanit Perëndimor.
Në një deklaratë për mediat nga Korça ai u pyet në lidhje me shanset e Shqipërisë për t’u integruar në BE.
Gjatë fjalës së tij ambasadori u shpreh optimist për grupin e ri të kapitullit.
“Negociatat kanë nisur tashmë por besoj për grupin e ri të kapitullit ky është vendim që do merret nga këshilli por besoj se do jepet. Ky është një proces që është në vazhdim nuk ka arsye të mos hapet së shpejti dhe është një vendim që do merret”, tha ambasadori.
I pyetur për situatën politike ne vend, duke marrë shkas nga bllokimi i seancave plenare nga opozita, Reinout Vos u ka bërë thirrje partive politike që ti rikthehen procesit institucional të parlamentit në mënyrën më të mirë të mundshme.
“Në një vend demokratik parlamenti është zemra e gjithë shtetit dhe është për të ardhur keq që në një muaj procedurat parlamentare nuk kanë qenë në rrjedhën e duhur dhe unë ju bëj thirrje partive politike që ti rikthehen procesit institucional të parlamentit në mënyrën më të mirë të mundshme sepse edhe njëherë parlamenti është zemra e demokracisë”, u shpreh ai./Opinion.al
