I ftuar në Kongresin e Arsimit, ambasadori i Britanisë së Madhe në vendin tonë ka folur për largimin masiv të të rinjve të vendit tonë drejt Britanisë.
Gjatë fjalës së tij, ambasadori Alastair King-Smith tha se udhetimi ilegal me gomone apo rrugë të tjera transporti drejt Britanisë së Madhe janë mënyra të rrezikshme ndërsa shtoi se shume të rinj shfrytëzohen nga kontrabandistët. Ai theksoi se premtimet e pasurisë së shpejtë janë gënjeshtra pasi të rinjtë, sipas tij, do detyrohen të përfshihen në aktivitete kriminale dhe drogë.
“Shumë të rinj largohen nga Shqipëria. Këta të rinj shfrytëzohen nga kontrabandistët, ne i nxisim që të ndalojnë. Premtimet e pasurisë së shpejtë janë gënjeshtra pasi do detyrohen të përfshihen në aktivitet kriminal dhe drogë, por këto kushte do bëhen edhe shumë të rrezikshme. Ju bëj thirrje të rinjve që mos të udhëtojnë në mënyrë të jashtëligjshme. Rruga drejt suksesit nuk varet nga gomonet, varet nga arsimi dhe puna e palodhur. Nuk mjafton që të japim argumente intelektuale. Ndaj ne do lançojmë një program për të nxitur mundësitë e punësimit të të rinjve që t’u japim aftësitë që kërkon tregu i punës”, tha Alastair King-Smith.
Ndër të tjera, ambasadori King-Smith foli edhe për bashkëpunimet në arsim mes Britanisë së Madhe dhe Shqipërisë.
“Kemi rënë dakord që duhet të nxisim angazhimet midis Mbretërisë së Bashkuar dhe Shqipërisë dhe jam i lumtur teksa shoh këtë plan të realizuar. Shumë Universitete nga Britania e Madhe po zhvillojnë kurse këtu në Shqipëri. Së shpejti do realizojmë partneritet të ri në sistemin mjekësor me standarde britanike këtu në Shqipëri”, theksoi ambasadori i Britanisë.
