“Qarkullojnë më shumë se 2 miliardë euro para të pista. Pra ekziston risku se këto para mund të përdoren për të blerë deputetë”. Kështu deklaroi dy ditë më parë ambasadori i OSBE në vendin tonë, Borchardt, në studion e “Tonight Inva Tare”.
Kjo deklaratë shkaktoi mjaft reagime në politikë dhe në publik, duke rritur presionin mbi Tahirin, por ambasadori Borchardt nuk i qendroi gjatë deklaratës. Dje përmes një postimi në Twitter zyra e OSBE tha se bëhet fjalë për shifrat e vitit 2013.
Ndërkaq sot vetë ambasadori ka takuar ministrin e Brendshëm, Saimir Tahiri, të cilit i ka shprehur mbështetje në luftën që po bën policia kundër kanabisit. Pas përfundimit të takimit, ai iu përgjigj interesit të medias:
Pyetje: Cili ishte qëllimi i takimit me Ministrin sot?
Ambasador Borchardt: I dorëzova Ministrit një raport vlerësimi për bashkëpunimin midis OSBE-së dhe Policisë, që mbulon periudhën 2009-2015. Ky raport përmban disa rekomandime dhe përfundime, për të cilat diskutuam. Më pas, diskutuam, sigurisht, edhe për planet e bashkëpunimit në të ardhmen, që i kemi diskutuar tashmë edhe me policinë, të cilën dëshirojmë ta mbështesim në disa fusha. Ato shtrihen nga masat kundër ekstremizmit të dhunshëm, te policimi në komunitet e deri te lufta kundër krimit të organizuar.
Pyetje: Para pak ditësh bëtë një deklaratë ku thatë që qarkullojnë dy miliardë euro. A i qëndroni sërish kësaj deklarate?
Ambasador Borchardt: Natyrisht. Pati disa keqkuptime në publik, të cilat i sqaruam përmes një teksti në Tëitter.
Pyetje: Që do të thotë?
Ambasador Borchardt: Në vitin 2013-n ka pasur një vlerësim ndërkombëtar të prodhimit të kanabisit këtu në Shqipëri. Ishin rreth 1,000 ton, të cilat kur shiten në rrugët e Berlinit, Romës, apo kudo gjetkë në Evropën Perëndimore, arrijnë në 2 miliardë euro. Vitin e kaluar pamë shkatërrimin e rreth 2,5 milionë bimësh kanabis. Kjo tregon se ka ende shumë energji kriminale dhe unë do të doja ta përgëzoja policinë që ka gjetur një sasi kaq të madhe, por sekuestrimet që vazhdojnë në Adriatik, në kufirin me Greqinë dhe në vende të tjera tregojnë se kjo punë duhet të vazhdojë dhe ne folëm edhe për mënyrat dhe mjetet me të cilat ne mund ta mbështesim policinë në këtë punë. Në të njëjtën kohë, diskutuam shkurtimisht edhe për nevojën për të çuar përpara reformën zgjedhore, veçanërisht me qëllim për të ndaluar paratë e pista që të përdoren në procesin zgjedhor. Gjithçka sa thashë, e shprehëm me katër fjali në Twitter dje.
/Opinion.al
*Më poshtë deklarata e OSBE në Twitter dt, 23 shkurt, dhe intervista e Borchardt në ora news më 22 shkurt
