Ambasadori amerikan në Prishtinë, Jeffrey Hovenier, ka zhvilluar një takim me disa politikanë serbë të Kosovës për të diskutuar për çështjet e rëndësishme në komunitetin e tyre.
Përmes një postimi në rrjete sociale, Hovenier thotë se Kosova sovrane, shumëetnike dhe demokratike ka mbështetjen e tyre.
“Pata rastin të jem mikpritës i disa përfaqësuesve politikanë serbë të Kosovës sot. Mendimet e ndryshme dhe pluralizmi janë përbërës të çdo demokracie të fuqishme dhe të shëndoshë. Unë e përsërita mbështetjen tonë për një Kosovë sovrane, shumetnike dhe demokratike”, shkroi Hovenier në X, ish-Twitter.
Në foton e publikuar nga ambasadori duken se kanë qenë të pranishëm në takim: lideri i Partisë së Serbëve të Kosovës, Aleksandar Jabllanoviq, kryetari i Lëvizjes së Serbëve të Kosovës, Branimir Stojanoviq, kryetari i Nismës Qytetare për Zubin Potokun, Milija Bishevac, dhe kryetari i Iniciativës “Mbijetesa Serbe”, Aleksandar Arsenijeviq.
