Ambasadorja e Gjermanisë Susanne Schutz dhe më pas ai i Bashkimit Europian Luigi Soreca kanë zhvilluar një takim këtë mëngjes me kreun demokrat Lulzim Basha në selinë e Partisë Demokratike. Takimi ka në fokus vendimin e opozitës për të djegur mandatet e deputetëve. Dje Luigi Soreca u shpreh se vendimi i PD-së nuk e ndihmon Shqipërinë në perspektivën e saj europiane.
Kujtojmë që sot në orën 17:00 do të mblidhet Këshilli Kombëtar i Partisë Demokratike, i cili do të vendosë për dorëzimin e mandateve. Kryetar i Këshillit Kombëtar është Bujar Nishani, i cili ditën e djeshme është takuar me Lulzim Bashën. Në bazë të artikulimit të këtyre ditëve, Bujar Nishani mbështet vendimin për dorëzimin e mandateve dhe e quan atë historik.
Dorëzimi i mandateve u miratua dje edhe nga Kryesia e Partisë Demokratike, pas një mbledhjeje që zgjati dy orë.
“Mbledhja e Kryesisë së PD sapo përfundoi me votë unaime u miratua vendimi për djegie mandatesh. Djegia e mandateve nuk është qëllim në vetvete. Djegia e mandateve është alternativa e fundit që i është lënë opozitës që të arrijë një qëllim madhor”, u shpreh dje Lulzim Basha.
