Ambasada amerikane në Tiranë ka shpërndarë një karikaturë me një banane dhe një peshk, duke thënë “Bravo Shqipëri, bravo Gjermani”.
Pjesa e bananes në karikaturë nënkupton pronarin e kompanisë së bananeve, Arbër Çekaj, i arrestuar sot në Gjermani si porositës i sasisë prej 630 kg kokainë të kapur në portin e Durrësit.
Ambasadori amerikan në Tiranë, Donald Lu, është personi që futi në fjalorin e përditshëm politik dhe jo vetëm, nocionin ‘peshk i madh’.
Lu foli mbi këtë koncept të huazuar nga fjalori mafioz që në vitin 2017, ndërsa premtoi se ‘në janar nis kapja e peshqve të mëdhenj’, si rezultat i reformës në drejtësi.
Nga ai moment, njerëzit e kuptuan me entuziasëm se do të niste kapja e zyrtarëve shtetërorë dhe mafiozëve të mëdhenj të përfshirë në korrupsion.
Media, njerëzit e zakonshëm dhe heraherës edhe politikanë të nivelit të dytë e glorifikuan më shumë nocionin ‘peshk i madh’.
Të gjithë këta, prisnin se në janar do bëhej hataja, madje kishte nga ata që piketonin se kush do ta hante i pari dhe kush i dyti e kështu me radhë…
Por as në janar, as në shkurt, as në mars, as në prill dhe as tani në maj…, nuk është kapur asnjë ‘peshk i madh’.
Mirëpo, Donald Lu është shfaqur përsëri dhe ka vënë gishtin tregues mbi një ‘peshk të madh’. Me sa duket, dështimin për kapjen e ‘peshqve të mëdhenj’; ambasadori e ka kompensuar duke vënë gishtin, si në dyqanin e peshkut, pikërisht te njëri që i doli para syve: Ja merreni këtë, ky është peshk i madh.
Gjatë një aktiviteti paraditen e sotme, ambasadori amerikan, Donald Lu përmendi në radhët e “peshqve të mëdhenj”, edhe pronarin e kompanisë së bananeve Arbër Çekajn, duke kërkuar arrestimin e tij.
“Shqipëria ka mbështetur kapjen e një peshku të madh të drogës, Met Kanani, që u arrestua në Shqipëri me 22 mars. Urdhërarreste janë lëshuar edhe për dy trafikantë të tjerë të mëdhenj, Klement Bali dhe Arbër Çekaj por ata duhet të kapen”, tha Lu.
Pak orë më vonë, u njoftuar se Çekaj ishte arrestuar në Gjermani, arrestim që u bë publik nga ministri i Brendshëm, Fatmir Xhafaj./Reldar Dedaj- Opinion.al
