Ambasada e Shteteve të Bashkuara të Amerikës në Tiranë ka reaguar për herë të parë ndaj vendimit të opozitës së bashkuar për djegien e mandateve të deputetëve.
Në reagimin e saj ambasada e SHBA-së thekson se një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese. Gjithahstu ajo bën thirrje deputetëve të ngrihen mbi sherret politike dhe të refuzojnë thirrjet për të braktisur mandatet e tyre.
“Një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese. Kërcënimet nga Partia Demokratike, Lëvizja Socialiste për Integrim dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme. Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet e tyre dhe të mbrojnë idealet dhe parimet që janë me rëndësi thelbësore për çdo demokraci të fortë. Nëse dështoni të bëni punën tuaj, do të zhgënjeni njerëzit të cilëve keni privilegjin tu shërbeni.”, shkruan Ambasada Amerikane në Tiranë. Dl. Opinion.al
