Kushtet aktuale të punës dhe krijimi i një mjedisi të sigurt e profesional për punonjësit e medias audiovizive ishin në qendër të diskutimeve gjatë tryezës së organizuar nga Autoriteti i Mediave Audiovizive në bashkëpunim me Inspektoratin Shtetëror të Punës dhe Shërbimeve Shoqërore.
Ky aktivitet vjen pas nënshkrimit të një marrëveshjeje bashkëpunimi mes këtyre dy institucioneve, me qëllim vendosjen e një mekanizmi koordinues për të adresuar problematikat që prekin këtë sektor.
Kryetarja e AMA-s, Armela Krasniqi, theksoi se media audiovizive përballet me një sërë sfidash.
“Këtu, nuk e kam fjalën vetëm tek sasia, shpejtësia e informacionit, konkurenca për shikueshmëri, ap tek fakti që teknologjia në fakt ka ridimensionuar vetë konceptin e medias. E kam fjalën për një sërë problematikash të tjera, ndoshta të trashëguara edhe nga e shkuara që kërkojnë vëmendjen tonë dhe që lidhen me mungesën e garancive të mjaftueshme për kushtet e punës së gazetarëve”, tha Krasniqi.
Për të luftuar informalitetin në media, Autoriteti i Mediave Audiovizive do të ketë një fushatë sensibilizimi ku do të përfshihen edhe trajnime me punonjës të medias për të denoncuar abuzimet.
“Edhe pse AMA nuk ka kompetenca të drejtpërdrejta, mbi marrëdhëniet e punës së mediave, shpesh ne kemi marrë sinjalizime nga vetë gazetrët, nga organizata të ndryshme të shoqërisë civile, për problematika të tilla si mungesa e kontratave, informaliteti, vonesat në pagesë, apo mungesa e sigurimeve shoqërore në disa raste. Të gjitha këto, i kemi adresuar dhe ndjekur, por kemi menduar të shkojmë një hap më tej”, shtoi Krasniqi.
Nga ana tjetër, kreu i Inspektoratit të Punës, Eljo Muçaj, deklaroi se gjatë viteve 2024–2025 janë kryer 135 kontrolle në media.
“Sa i përket ankesave, Inspektorati i Punës merr 920 ankesa në vit. 75% e ankesave që vijnë në Inspektoratin e Punës, i është dhënë e drejtë punëmarrësve, pra ankuesve. Në 6-mujorin e parë të 2025, ne kemi 16 ankesa, e janë të lidhura me gjashtë subjekte mediatike. Pretendimet e ankesave ato që u prekën e më lartë, janë mos pagesa, kontributet e papaguara, pagesa për orën shtesë, ndryshimi i vendit të punës pa pëlqimin e palëve”, tha Muçaj.
Kryeinspektori theksoi përdorimin e sistemit inteligjent MIRA për inspektime të bazuara në analiza risku, një risi që ka përmirësuar ndjeshëm efikasitetin në kontrollin e kushteve të punës.
Klan News
