Me siguri të gjithë e njohin programin “Carpool Karaoke”, me drejtues James Corden, një prej prodhimeve televizive më trendy dhe më të ndjekura të viteve të fundit. Shumë emra të famshëm janë bërë pjesë e këtij formati, por në një profil tjetër, jashtë studios televizive dhe larg pyetjeve standarde që të imponon ekrani. Personazhe të famshëm si Adele, Gwen Stefani, Bruno Mars, Madonna, Britney Spears, Lady Gaga e deri te Michelle Obama janë bërë pjesë e një interviste ndryshe… në një udhëtim me makinë.
“Carpool Karaoke”, së shpejti do të vijë edhe në versionin shqiptar. Programi më i ri, i frymëzuar nga James Corden, do të drejtohet nga producentja Alketa Vejsiu, e cila rrëfen se ky format sportiv e interesant do të jetë po kaq dinamik edhe në versionin shqiptar.
Prova e parë e programit të ri vjen këtë të shtunë, në “Xing me Ermalin”, por ka një ndryshim: këtë herë është Ermali në timon dhe Alketa pasagjerja.
“Carpool Karaoke” është blerë me të drejta të plota dhe shumë shpejt do të nisë transmetimin në Televizionin Klan.
