Epidemiologun Ilir Alimehmeti thotë se Shqipëria ka dalë nga faza akute e pandemisë së koronavirusit dhe se situata këtë periudhë është e qetë pavarësisht varianteve shumë më ngjitëse që janë në qarkullim.
Në një intervistë për “A2”, Alimehmeti shprehet se edhe varinati “Ba2” i konfirmuar zyrtarisht vetëm pak javë më parë, ka qenë në vendin tonë që në muajin shkurt, kohë kur u shënua piku i pandemisë së koronavirusit.
Për epidemiologun Alimehmeti ka ardhur koha që Shqipëria të heqë tërësisht masat anti-covid.
Aktualisht shifrat e infektimeve ditore janë shumë të ulëta, 50-60 raste në të gjithë vendin. Edhe më pozitive duket situata në spitale ku sipas mjekëve ka rënë ndjeshëm numri i shtrimeve dhe urgjencave ditore.
Vetëm 6 pacientë janë të shtruar në spitalin covid-3, ndërsa vihet re ulje e ditëve të qëndrimit. Ndërkohë dy qarqe të vendit, Lezha dhe Dibra prej ditësh nuk kanë asnjë rast infektimi nga koronavirusi.
