Policia Gjermane e qytetit Hamm e ka ndaluar Taulant Alibeajn pasditen e 5 Prillit si i dyshuar se ishte përfshirë në një grabitje me armë.
Pas procedurave ai është lënë i lirë. Por autoritetet gjermane kanë nisur kërkesa për të marrë informacion në Shqipëri e Itali, për shkak të 3 dokumentave të ndryshëm të identitetit që i janë gjetur atij, njëri prej të cilëve ishte italian.
Alibeaj mbante një letërnjoftim me gjeneralitet Xhavit Mornica, një tjetër me emrin e tij të vërtetë, Taulant Alibeaj, lëshuar nga policia shqiptare, si inspektor pranë repartit RES dhe një dokument të lëshuar nga Ministria e Financave Italiane në vitin 2002, me një kod fiskal me gjeneralitet e plota të Alibeajt.
Nisur nga këto dokumenta për të vërtetuar gjeneralitet e sakta të këtij shtetasi autoritet gjermane i kanë kërkuar informacion policisë shqiptare dhe homologëve italiane.
Por sa është mbajtur i ndaluar Taulant Alibeaj dhe përse është liruar pak ditë më pas kjo ende mbetet e paqartë.
I kontaktuar në telefon nga Tv Klan, ai tha se nuk ka asnjë problem me drejtësinë gjermane.
Ai është vëllai i ish-deputetit Enkelejd Alibeaj dhe ky i fundit, e quajti lajmin e dalë nga policia si sajesë për motive politike.
Taulant Alibeaj ka punuar në policinë e shtetit deri në Qershor të vitit 2013 kur është larguar me dëshirë.
Tv Klan
