Në mbledhjen e kësaj të enjteje të Grupit Parlamentar të PD Enkelejd Alibeaj ka deklaruar se sot nuk do të merret asnjë vendim, sepse mbledhja është me natyrë informale për informimin e deputetëve për ecurinë e deritanishme për procesin e zgjedhjes së Presidentit të Republikës.
Më tej ai ka thënë se ka një tentativë për të përçarë edhe Grupin Parlamentar, duke theksuar se do të bëjë gjithçka ka në dorë që kjo mos të ndodhë.
“Kjo është një mbledhje informuese e kolegëve për mbledhjen e Konferencës së Kryetarëve, duke synuar hapjen e debatit brenda grupit parlamentar të PD për procesin e zgjedhjes së Presidentit të Republikës. Sot nuk kemi për të marrë asnjë vendim, sepse mbledhja është me natyrë informale për informimin tuaj për ecurinë e deri tanishme dhe shkëmbimin e mendimeve. Me disa prej kolegëve kam diskutuar edhe personalisht dhe i di mendimet e tyre, me intereson që vendimin për procesin ta marrim të gjithë bashkë, në një moment tjetër, pasi të kemi ezauruar fazën e marrjes së mendimit të secilit.
Ka një tentativë për të përçarë edhe Grupin Parlamentar, edhe pse gjatë këtij muaji kemi bërë përpjekje serioze për të bashkuar grupin. Nuk e kuptoj dot këtë sjellje dhe është një tjetër akt përçarës.
Secili nga anëtarët e këtij grupi kane bere përpjekje për të mos lejuar përçarjen e partisë. Refuzoj me forcë çdo tentativë për ndarjen e partisë, dhe me gjithçka kam në dorë do bëj çmos që kjo mos të ndodhë”, tha Alibeaj.
