Policia deklaroi se 42 nga 60 protestuesit e proceduar, kanë ushtruar dhunë ndaj uniformave blu. Por ish deputeti i Partisë Demokratike, Enkelejd Alibeaj thotë se është Edi Rama ai që i ka dhunuar më shumë policët.
Alibeaj ka reaguar menjëherë pas njoftimit të policisë për bilancin e protestës së djeshme. Ai shkruan në Facebook se populli është në këmbë për ti rikthyer dinjitetin Policisë së Shtetit e jo për ta dhunuar atë.
Ish deputeti akuzon kryeministrin se ai po e përdor policinë në shërbim të krimit dhe në funksion të drogës. Krerët e saj janë të inkriminuar dhe prandaj policia duhet çliruar bashkë me gjithë popullin nga zgjedha e korrupsionit.
Në emër të PD, Alibeaj bën thirrje se partia e tij ka qenë gjithmonë në mbrojtje të policisë megjithëse në çdo protestë ka patur protestues të dhunuar nga policia.
Reagimi i plotë i Enkelejd Alibeajt
Nuk ka njeri në Shqipëri që i ka dhunuar më shumë policët sesa Edi Rama duke i kthyer ata në shërbim të krimit, roje dhe punonjës ngarkim shkarkimi të hashashit, heroinës dhe kokainës.
Policia që drejtohet nga të inkriminuar do te clirohet bashke me gjithë popullin nga zgjedha e krimit dhe te korruptuarit.
Policia është e popullit dhe jo kundër popullit, qeveria është e krimit kundër policisë dhe popullit të saj. Populli është në këmbë për t’i kthyer dinjitetin dhe Policisë së Shtetit, prandaj ne jemi me ta ne krah dhe mbrojtje te tyre.
Ndryshe nga kjo qeveri qe, kur ishte ne opozite, dhunonte policinë, Lulzim Basha dhe PD ne çdo proteste kane qene ne mbrojtje te policeve me thirrje te hapura dhe me veprime konkrete, edhe pse protestuesit janë dhunuar dhe provokuar vazhdimisht nga police te infiltruar civile prej shefat e tyre te inkriminuar. /Opinion.al
