Kreu i komanduar i Partisë Demokratike, Enkelejd Alibeaj prezantoi këtë të shtunë kandidatin e grupimit të tij për bashkinë e Patosit.
Gjatë fjalës së tij, Alibeaj tha se popullit i është marrë fryma nga trinomi Berisha, Meta, Rama të cilët sipas tij, rrinë në pushtet se janë në marrëveshje me njëri-tjetrin.
“Sot jemi pikërisht në këtë test, për të krijuar një alternativë jashtë treshes së vjetër të dinosaurëve të politikës. Ka që në vitin 1998 Edi Rama në pushtet pa zbritur nga karrigia. Vetëm 1 vit ra nga Bashkia Tiranë, për 1 vit e pak erdhi Kryeministër. Nga ’98-2023.
Ka nga ’90 në mos më tepër Sali Berisha që është në politikë aktive. Dy herë President, dy herë Kryeministër, po kaq ka Ilir Metaj. Popull që s’paska fare kreativitet për të nxjerrë figura të reja politike ose për të krijuar një proces të qarkullimit të elitave? Jo, e ka nevojën, e ka dëshirën, e ka potencialin, thjesht dhe vetëm i është zënë fryma nga këta tre njerëz të cilët vazhdojnë dhe mbijetojnë e deri më sot mbijetojnë për shkak se janë në një marrëveshje me njëri-tjetrin”,-u shpreh Enkelejd Alibeaj.
