Deputeti demokrat Enkelejd Alibeaj ka njoftuar ministren e Drejtësisë Etilda Gjonaj sot në Kuvend se do të depozitojë kallëzim penal ndaj saj për shpërdorim detyre, pasi ka lejuar ekstradimin e Nezar Seitit në Itali.
Deklarata erdhi pas replikave që ai pati me ministren Gjonaj, e cila e konsideroi thirrjen e saj në interpelancë si politike dhe se opozita po kërkonte me çdo kusht të minonte reformën në drejtësi. Ja debati midis tyre:
Gjonaj: Orvajtjet tuaja të dëshpëruara tregojnë se po kapeni si i mbyturi pas fijes së barit dhe aq më shumë rriten tonet tuaja kundër ndërkombëtarëve, Prokurorisë, ministrisë, Edi Ramës dhe meje. Sa më shumë ngushtohet laku, aq më shumë shtohen shkulmet tuaja. Z. Alibeaj, është e thjeshtë. Reforma në drejtësi ka filluar zbatimin, ajo reformë që ju keni bërë manikacione për ta ndalur. Pushteti gjyqësor po rrëshket në duart e atyre që duhet ta kishin që në fillim, gjyqtarët dhe prokurorët e ndershëm. Ju mund të vazhdoni të hidhni baltë mbi mua, por nuk keni për të më ndalur as mua dhe aq qeverinë.
Alibeaj: Meqë reforma në drejtësi ka nisur rrugën, rrugë e mbarë të qoftë tek 313-a. Sepse e ke ditur, e ke firmosur. Ja tek e ke, e kë nënshkruar dy herë zonjë. Faji është i këtij që të ka marrë dorën ty dhe në nënshkruar. Meqë reforma ka filluar rrugëtimin, dy gjëra duhet të bësh: Kërko avokat se sot do të depozitoj kallëzim penal për ministren Gjonaj për shpërdorim detyre. Tek 313-a.
