Prokuroria nis hetimet për pasurinë e deputetit socialist Alfred Peza dhe bashkëshortes së tij, Mirela Ndini pas blerjes së aksioneve më vlerë 1.3 miliardë lekë në një bankë të nivelit të dytë në Tiranë. Dyshimet janë për “fshehje të pasurisë” dhe “pastrim parash”.
Prokururora e Përgjithshme nis hetimet për deputetin socialist Alfred Peza për akuzën e “fshehjes së pasurisë” dhe “pastrimit të parave” në bashkëpunim.
Hetimet janë urdhëruar kryesisht nga Prokurori i Përgjithshëm, Adriatik Llalla, i cili ka caktuar një prokuror për hetimin e çështjes, raporton Tv Abcnews.
Për llogari të kësaj dosje, mësohet se paraditën e së premtës në prokurori ka qenë ish-bashkëshortja e deputetit Peza, Adelina Toli, e cila është shprehur e gatshme të ndihmojë hetuesit në lidhje me pagesat e vogla që deputeti socialist ka paguar në formën e pensionit ushqimor për fëmijën e tij.
Ndërkohë rreth orës 15:00 të pasditës, dy oficerë të Prokurorisë së Përgjithshme kanë zbarkuar pranë Inspektoriatrit të Lartë të Deklarimeve dhe Kontrollit të Pasurisë dhe Konfliktit të interesit. Mësohet se oficerët, kanë sekuestruar dosjen personale të deklarimit të pasurisë ndër vite të deputetit Alfred Peza dhe bashkëshortes së tij.
Burimet nuk japin shumë detaje në lidhje me çështjen, me arsyetimin se ndodhen në fazën e hetimit paraprak, të grumbullimit të provave shkresore.
Nga ana tjetër, sipas akuzës nuk përjashtohet që në ditët në vazhdim prokuroria t’i kërkojë të gjitha bankave të nivelit të dytë që të evidentojnë në mënyrë analitike llogaritë bankare në emër të deputetit, bashkëshortes dhe fëmijëve.
Veç bankave, burimet thonë se do i drejtohet edhe Zyrës së Regjistrimit të Pasurive në Tiranë për të evidentuar pronat që figurojnë të regjistruara në emër të deputetit dhe të afërmve të tij. Ndërkohë, pas mbledhjes së këtyre provave, burimet thonë se do të thirret për të dhënë versionin e tij të pasurisë edhe vetë deputeti i Partisë Socialiste Alfred Peza, tashmë person nën hetim.
Për këtë të fundit tre ditë më parë, ka qenë edhe vete institucioni i ILDKPKI-së që ka nisur një hetim administrativ të deklaratave të pasurisë për deputetin dhe bashkëshortten e tij.
Këto veprime, nisen vetëm pas publikimit në media të kontratës së blerjes së aksioneve në një bankë të nivelit të dytë nga bashkëshortja e deputetit me një vlerë prej rreth 1.3 miliard lekë. Vetë deputeti në daljet për mediat, është shprehur se pasuria e tij është e ligjshme dhe e deklaruar çdo vit në institucionet përkatëse.
