Aleati i Bashës ka paralajmëruar se nëse bëhen zgjedhjet në 30 qershor vendi do të shkojë në një konflikt civil. Në një konferencë për mediat, kreu i Partisë Republikane Fatmir Mediu tha se procesi zgjedhor në 30 qershor është anti-kushtetues dhe ilegjitim.
Sipas tij, kryeministri Edi Rama ka kapur institucionet zgjedhore si KQZ dhe Kolegjin Zgjedhor nëpërmjet presionit mbi gjyqtarët.
Nisur nga kjo situatë tha Mediu, opozita ka të drejtën kushtetuese që të mos lejojnë procesin zgjedhor.
“Shqiptarët dhe opozita kanë të drejtën legjitime dhe kushtetuese, bazuar në Kushtetutë dhe Dekretin e presidentit për shtyrjen e zgjedhjeve që të mos lejojnë një proces të tillë të shkatërrimit të Shqipërisë dhe të jenë të bashkuar në çdo skaj për të mbrojtur pluralizmin dhe kushtetutën shqiptare. Në 30 qershor nuk duhet dhe nuk do të ketë zgjedhje të ligjshme”, deklaroi Mediu, ndërsa një thirrje pati dhe për faktorin ndërkombëtar të cilin e paralajmëroi se do të ketë pasoja jo vetëm në Shqipëri por në gjithë rajonin.
Deklarata e plotë
Në emër të Partisë Republikane, i bëj thirrje gjithë socialistëve që besojnë tek liria dhe demokracia, zgjedhjet e lira dhe të ndershme, tek qeverisja nga njerëzit dhe për njerëzit, që duan një shtet pa krim dhe korrupsion, socialistë që kanë kontribuar në këto vite pluralizëm, për demokracinë dhe Shqipërinë anëtare e NATO-s dhe BE-së;
Të bashkohen me gjithë shqiptarët për të shmangur konfliktin civil që po përgatit Rama me klanet e tij, nëpërmjet një proçesi farsë zgjedhor, të paprecedent në 30 Qershor.
Ky proçes është antikushtetues dhe ilegjitim, vjen ndesh me Kushtetutën, garantimin e unitetit të popullit dhe pluralizmit, votimit të lirë dhe të fshehtë.
Rama ka kapur dhe përdor politikisht institucionet zgjedhore si KQZ, me mazhorancë politike antikushtetuese, e provuar e paligjeshme dhe politike në çdo vendim te saj, Kolegjin zgjedhor nëpërmjet presionit mbi gjyqtarët për vettingun politik.
Rama ka vjedhur zgjedhjet në çdo rast me bandat të cilat kanë komanduar strukturat e Partisë Socialiste.
Ka shkatërruar parlamentarizmin, duke e kthyer Parlamentin në një teatër qesharak dhe absurd.
Ka shkatërruar dhe po shkatërron pushtetin gjyqësor, jemi i vetmi vend në botë pa Gjykatë Kushtetuese dhe Gjykatë të Lartë.
Proçesi farsë dhe i dhunshëm që po organizon më 30 Qershor, është instalimi përfundimtar i grushtit të Shtetit dhe diktaturës së krimit dhe korrupsionit në Shqipëri.
Shqiptarët dhe opozita kanë të drejtën legjitime kushtetuese, bazuar në dekretin e Presidentit për shtyrjen e zgjedhjeve, që të mos lejojnë një proçes të tillë, të shkatërrimit të Shqipërisë dhe do jenë të bashkuar në çdo skaj të Shqipërisë, për të mbrojtur pluralizmin dhe Kushtetutën.
Në 30 qershor nuk duhet dhe nuk do ketë zgjedhje të ligjshme. Në emër të Partisë Republikane i bëj thirrje faktorit ndërkombëtar, atyre që kanë mbështetur pluralizmin, kushtetutshmërinë, luftën kundër krimit dhe korrupsionit, që mbështetën Shqipërinë në NATO dhe rrugën tonë Europiane, të ndalojnë këtë krim elektoral dhe antikombëtar të Ramës me pasoja për Shqipërinë dhe Rajonin./ Opinion.al
