Jeta si refugjate nga Kosova që kishte kërkuar strehim në Londër, do të jetë përmbajtja e albumit të ri muzikor të këngëtares shqiptare, Rita Ora i cili do të publikohet së shpejti.
Artistja me famë botërore është duke punuar për ta realizuar albumin e saj të dytë të shumëpritur, që për subjekt të këngëve do ta ketë jetën private të këngëtares. Në një intervistë për “Evening Standard”, Ora e ka përshkruar projektin e ri të bazuar në ngjarje reale me tekst të besueshëm nga jeta e saj.
“Unë nuk jam rritur vetëm si individ, por si një grua. Njerëzit do ta shohin këtë. Është çdo gjë nga jeta ime personale, për atë që unë nuk mund ta bëja për shkak të situatave të mëparshme dhe tani të qenët e lirë. Unë kurrë nuk kam qenë më e lirë se sa jam tani”, ka thënë Ora për “Evening Standard”, transmeton KultPlus.
“Është për çdo gjë nga të qenit refugjat, nga fluturimi nga Kosova dhe jeta në Londër, duke pasur këtë qytet të mahnitshëm që është i çmendur dhe plotë drita”, ka shtuar Ora teksa është pyetur për subjektin e këngëve të saj.
Këngëtarja nga Kosova ka thënë se aktualisht është duke punuar në studio regjistrimi dhe ka për qëllim që këtë projekt ta ketë gati deri në fund të vitit.
“Unë isha në Nju Jork për tre muaj në kuadër të aktivitetit America’s Next Top Model, tani unë jam në Londër për dy muaj regjistrim çdo ditë me ekipin tim të ëndrrave, pastaj unë fluturojnë në Los Anxhelos në tetor për të përfunduar albumin”, ka shtuar Rita Ora./ekspress
