Albin Kurti ka ardhur në Tiranë dhe është duke zhvilluar një takim me kryeministrin Edi Rama.
Prej rreth një ore kreu i Lëvizjes Vetëvendosje ndodhet në ambientet e kryeministrisë. Takimi i sotëm u paralajmëruar një ditë më parë nga Rama i cili tha se Kurti i kishte kërkuar atij një takim mbrëmjen e sotme.
Kurti pritet të kryesojë qeverinë e ardhshme të Kosovës, pasi Vetëvendosja fitoi zgjedhjet e 6 tetorit. Sa i përket temave që do të diskutojë me Ramën ai nuk ka dashur të zbulojë detaje.
Megjithatë bëhet e ditur se “mini-shengeni ballkanik”, ku Kosova e ka një ftesë, është një ndër to. Temat e tjera janë një seri marrëveshjesh që janë firmosur nga të dy qeveritë ndër vite, por që kanë pika të pa implementuara dhe të mbetura në letër.
Kryeministri Rama ka deklaruar se do t’ i propozonte Kurtit figurën e një ministri shteti për marrëdhëniet Shqipëri-Kosovë. /Opinion.al
