Kryeministri në detyrë i Kosovës, Albin Kurti ka reaguar në Facebook mbi një kërcënim në adresë të tij dhe LVV nga Garda Vullnetare Shqiptare.
Kurti shkruan se kërcënimi nuk është ndaj tij por ndaj Gjykatës Kushtetuese e cila po shqyrton dekretin e Presidentit Thaçi për krijimin e qeverisë së re në Kosovë.
Në një komunikatë të dy ditëve më parë ky grupim deklaronte se ishte kundër organizimit të protestave nga LVV duke i kosideruar ato të jashtëligjshme. Në komunikatë shkruhej se Kurti dhe udhëheqësit e LVV kanë arsye të shqetësohen për sigurinë e tyre dhe të familjarëve të tyre nga njësitet e Gardës.
Por kryeministri Kurti shkruan se këto kërcënime po tentojnë të frikësojnë anëtarët e Gjykatës Kushtetuese të Kosovës dhe ambasadorët e QUINT-it. Au thekson se është duke pritur vendimin e gjykatës dhe shton se në zgjedhjet e ardhshme në Kosovë do të thellojë diferencën si asnjë subjekt tjetër i parë në Kosovën e pasluftës.
Reagimi i plotë i Albin Kurtit
Kërcënimi ndaj meje nga e ashtuquajtura “Garda Vullnetare Shqiptare”, në fakt, nuk është ndaj meje. Ky është kërcënim ndaj Gjykatës Kushtetuese, në veçanti, ndaj Kryetares së Gjykatës, znj. Arta Rama-Hajrizi dhe Gjyqtarit Raportues të çështjes KO 72/20, z. Nexhmi Rexha. Nuk ka shpjegim tjetër.
Regjimi i vjetër e di se nuk ka shpresë për të. Pasi që kanë harruar sa moti e patën braktisur popullin, tash populli po ua përkujton përditë se edhe ai masivisht i ka braktisur ata.
Ata janë të frikësuarit që duan të frikësojnë Gjykatën Kushtetuese dhe jo vetëm. Ata po duan t’i frikësojnë edhe ambasadorët e Quintit me destabilizim nëse kapoja i PRONTO-s, Presidenti i Republikës, e humbet rastin. Dekreti i Presidentit nuk është amandament kushtetute. Për çka nuk flet Kushtetuta nuk mund të flasë Presidenti. Ai duhet ta respektojë Kushtetutën dhe nuk mund ta shkruajë atë.
Ne jemi duke i ndjekur me kujdes zhvillimet teksa po presim Aktgjykimin e Gjykatës Kushtetuese. Pyetjet e njëanshme që thuhet se janë bërë nga Gjykata Kushtetuese në Forumin e Venedikut shpresojmë se janë lajm i rremë. Ndërkaq, ‘dokumentet’ në 3800 faqe nga koha e shkrimit të Kushtetutës, të humbura për vitin 2014 e të ‘gjetura’ tani, e kanë pasur afatin e skadencës porsi regjimi i vjetër – 6 tetor 2019!
Në zgjedhjet e ardhshme do ta thellojmë diferencën si asnjë subjekt tjetër i parë në Kosovën e pasluftës”. /Opinion.al
