Kryeministri Albin Kurti është thirrur në Prokurorinë Speciale. Lajmi është publikuar në faqen e Facebook-ut të zëdhënësit të qeverisë së Kosovës, Përparim Kryeziu.
“Teksa kryeministri Kurti ndodhet në mbledhje të Kryesisë së Lëvizjes Vetëvendosje! për të përmbyllur listën e kandidatëve për deputetë nga koalicioni LVV, Guxo dhe Alternativa në zgjedhjet e vitit 2025, nga kryeministria më njoftuan se ka ardhur një ftesë për të nga Prokuroria Speciale”, njofton Kryeziu.
Sipas tij, kjo bëhet me qëllim për të ndikuar në rezultatin e zgjedhjeve të 2025, sikurse në 2021, që një vendim i gjyqësorit pamundësonte garimin e Kurtit në zgjedhjet e 14 shkurtit 2021.
“Në zgjedhjet e kaluara kishte një vendim gjyqësor i cili ia kishte pamundësuar kandidimin në garën zgjedhore të 14 shkurtit 2021, kurse tash përmes kësaj ftese po tentohet ndikimi në rezultatin e zgjedhjeve të 2025. Qëllimi mbetet i njëjtë. Metoda ka ndryshuar. Kjo është ndërhyrje e sistemit të drejtësisë në proces zgjedhor”.
