Sot është përkujtuar 21 vjetori i një ndër masakrave më të rënda të ndodhur në Kosovë nga ushtria serbe. Më 15 janar të vitit 1999, forcat policore dhe ushtarake serbe vranë 45 civilë shqiptarë, ngjarje kjo e cila ndërgjegjësoi ndërkombëtarët për të ndërhyrë në Kosovë.
Lidhur me ngjarjen e rëndë, kreu i Lëvizjes Vetëvendosje, Albin Kurti ka bërë homazhe në varrezat dëshmorëve, ndërsa ka theksuar që është detyrimi i institucioneve që të gjithë ata që urdhëruan dhe kryen këtë masakër të dënohen. Kurti tha se drejtësia e mohuar deri më tani, përbën krim të vazhdueshëm ndaj popullit dhe shtetit të Kosovës.
“Lajmi për Masakrën e Reçakut e tronditi dhe tmerroi Kosovën por e ndërgjegjësoi dhe alarmoi botën demokratike dhe diplomacinë ndërkombëtare. Masakra e Reçakut ishte vendimtare që NATO ta bombardonte Jugosllavinë e Millosheviqit….21 vite më vonë nuk ka drejtësi për viktimat dhe familjet dhe kjo drejtësi e mohuar paraqet krim të vazhdueshëm ndaj njerëzve tanë, popullit tanë, ndaj shtetit tonë, është obligim i institucioneve vendore dhe i partnerëve tanë ndërkombëtarë që të sjellim drejtësi, të shtojmë trysni mbi Serbinë ashtu që të gjithë kriminelët që ekzekutuan dhe ata që urdhëruan masakrën e Reçakut të nxirren para proceseve gjyqësore dhe të dënohen”, tha Kurti./ Opinion.al
