Alban Hoxha ka mbetur pa dyshim i zhgënjyer nga humbja përballë Salzburgut. Kapiteni i Partizanit ka pranuar se skuadra në përgjithësi ka luajtur mirë, por ndryshe nga trajneri ai e thotë troç: “Gaboi Atanda”. Po, pasi loja e mbrojtësit afrikan la shumë për të dëshiruar dje që në start dhe, më pas, u mbyll me dy gabime individuale që i kushtuan 2 gola eliminimi Partizanit.
Ndeshja
“Ishte një eliminim i hidhur. U ndjeva keq, të them të drejtën, sepse nuk e merituam të humbisnim. Skuadra luajti shumë mirë dhe nuk i lejuam praktikisht asgjë kundërshtarit. Më pas e pësuam për dy gabime individuale. Në të dy rastet, për fat të keq, ishte Atanda. E vështirë për t’u kapërdirë, por u dënuam nga dy gabime individuale, sepse Salzburgu nuk na rrezikoi asnjëherë me aksione para portës”, deklaroi Hoxha pas ndeshjes ekskluzivisht për “Panorama Sport”.
E ardhmja
Alban Hoxha është një ndër lojtarët më të kërkuar te Partizani. Rritja cilësore gjatë sezoneve të fundit, si dhe paraqitjet e mira në kompeticionet europiane kanë ngjallur interesimin e disa klubeve italiane dhe turke. Portieri, gjithsesi, nuk kërkon të zhbalancohet në këtë fazë delikate të të kuqve, duke evituar të flasë për të ardhmen në këtë moment. Nga ana tjetër, presidenti i klubit, Gaz Demi, i ka bërë të qartë se nuk do të jetë pengesë për të mbajtur me çdo kusht kapitenin e skuadrës edhe sezonin tjetër. Sipas tij, nëse në adresë të portierit vjen një ofertë e mirë nga jashtë, e cila kënaq financiarisht edhe klubin, atëherë nuk do ta pengojë lojtarin të largohet.
