TIRANE- Balerina e njohur e “Tv Klan” është edhe njëra prej velinave në emisionin “Stop”. Ajo tregon se si u bë pjesë e këtij formati pas disa audicionesh.
Si ju erdhi ftesa për të qenë pjesë e programit “Stop”?
U bënë audicione me vajza nga mbarë Shqipëria. Pasi panë dhe testuan disa vajza, menduan se do të ishim më mirë ne në atë skenë, ne balerinat disavjeçare të “Tv Klan”. Na thanë që, “ju vajza i duheni këtij formati, keni trupin të bukur, kërceni mirë”, ndaj dhe vendosën që do të ishim ne balerinat e reja të “Stop”.
Si i ke marrëdhëniet me Encën, balerinën tjetër të “Stop”it, a ka rivalitet mes jush?
Unë me Encën jemi mikesha prej kohësh, kalojmë kohë së bashku edhe kur nuk jemi në punë. Rivalitetet nuk i mendojmë aspak, ne jemi mike, pastaj kolege. Mundohemi të jemi sa më tolerante karshi njëratjetrës. Kjo është shoqëria e vërtetë.
Si po ndihet Alba me rolin e velinës?
Ne nuk jemi velina. Ne vijmë nga bota e baletit klasik dhe kemi mbaruar një shkollë për këtë. Djemtë në skenë na quajnë “Thëllënza”, por nëse e shikon emisionin, kupton që ne nuk jemi modele që tundim vithet, por tregojmë aftësitë tona profesionale, pasi për këtë jemi aty, të bëjmë koreografi të mirëfillta.
Mendoni se do të jeni më e famshme tani që jeni pjesë e “Stop”?
Unë mendoj që po. “Stop” ka një shikueshmëri më të madhe, çka të jep mundësinë të jesh më pranë publikut. Do ndihemi më të populluara.
Si i keni marrëdhëniet me Saimirin dhe Gentin?
I kemi absolutisht shumë të mira. Na trajtojnë si vajzat e tyre, dhe ne ndihemi shumë komode teksa punojmë me to.
A ka raste që ju bezdisin ngacmimet e tyre?
Ashtu e kërkon formati, gjithçka është për humor, jemi mësuar tashmë, por nuk ka hatërmbetje.
Ju ngacmojnë aq shumë edhe jashtë kamerave?
Jo, fare! Thashë kemi marrëdhënie shumë të mira. Jashtë kamerave shpenzojmë kohë aq sa duhet, dhe kjo kohë na bën bashkë si miq të mirë, por asgjë më shumë.
Formati shpeshherë kërkon edhe një veshje ekstravagante; a do të jeni dakord ju me zhveshjen në skenë?
Çdo veshje besoj se ka masën e duhur. Nuk është se e kam problem ekstravagancën, por gjithmonë nëse është me masë. Unë dua të transmetoj Albën si balerinë aty, duke treguar atë që di të bëjë më mirë, kërcimin.
Shpeshherë velinat tentojnë edhe botën e televizionit; a e keni të tillë ambicie?
Është ende herët për ta thënë këtë gjë. Jam akoma tek “A”ja, kam akoma shumë rrugë për të bërë. Megjithatë primare për mua mbetet baleti.
A do të përpiqet Alba t’u ngjajë velinave të tjera, që kanë gjetur rrugën e suksesit në televizionet tona?
Alba nuk krahasohet me asnjë velinë tjetër, as nga mënyra se si kërcen, as nga bukuria. Nuk krahasohem me velinat apo të ashtuquajtura velina, sepse unë fillimisht jam balerinë.
